Nadir Adilov: “Hər bir barışıq sazişinin arxasında gərgin mediator əməyi durur”

 

 

"Hər bir barışıq sazişinin arxasında gərgin mediator əməyi durur. Təsəvvür edin ki, problemlərini, mübahisələrini həll edə bilməyən tərəflər və onları əhatə edən şəxslərlə ünsiyyətin qurulması, bu şəxslərin ilkin və tam mediasiya sessiyalarına dəvət edilməsi, onlarla təkbətək, iki tərəfli vəkil və nümayəndələri ilə görüşmək, mübahisə predmetini, mübahisə üzrə anlaşmanı, uzlaşmanı tənzimləmək həddindən artıq çətin bir məsələdir.

 

Nəzərə almaq lazımdır ki, biz mübahisəsi olan şəxslərlə işləyirik. Mübahisəsi yaranan istənilən şəxs isə əlbəttə ki, təbii haldır və heç də qınanılası deyildir ki, bir çox hallarda aqressiv olur. Burada mediatorlar başqa bir problemlə qarşılaşır. Aqressiya mühitinin aradan qaldırılması, tərəflərin qarşılıqlı görüşlərə cəlb edilməsi həddindən artıq mürəkkəblik yaradır. Amma çox sevindirici haldır ki, artıq mediatorlarımızın kifayət qədər peşəkarlığı artıb və onlar münaqişəli tərəflərlə işləməyi bacarırlar. Və əminliklə qeyd etmək istərdim ki, bu gün barışıq əldə etmək istəməyən mediator yoxdur. Hər bir mediatorun imzaladığı barışıq həm də onun brendi və markasıdır.

 

Bildiyiniz kimi, biz hər 3 aydan bir Mediasiya Şurası olaraq hesabatları şəffaf şəkildə mediasiya məxfiliyini qorumaqla ictimaiyyətə təqdim edirik. Bu hesabatlarda hər bir mediatorun məlumatları, icraatında olan işlərlə bağlı statistika qeyd edilir. Bəzən statistikası az olan mediatorlar da olur, bu təbiidir, bir çox hallarda tərəflər ilkin mediasiya prosesindən sonra tam mediasiya sessiyasında iştirakdan ya imtina edir, ya da mediatorun səyləri alınmır.

 

Bu məsələlərə bir daha qeyd edirəm ki, normal baxmaq lazımdır, çünki cəmiyyətimizdə mediasiya mədəniyyəti və təcrübəsi yeni formalaşır. Düşünürəm ki, zaman keçdikcə, istər cəmiyyətin, istərsə də mediatorların bu sahədə təcrübələri artdıqca bizim statistika daha da yüksək olacaq. Amma bu gün beynəlxalq ekspertlərin də verdikləri qiymətlərə görə mediatorlarımızın nəticələri kifayət qədər qənaətbəxşdir. Bu səbəbdən bütün mediatorlarımıza dərin təşəkkür edirəm. "

N. Adilov qeyd edib ki, Mediasiya Şurası hesabatlarını ictimaiyyətə təqdim etməmişdən iki həftə öncə hesabatların bir daha dürüstləşməsi, uçotun və ststistikanın bir daha dəqiq nəzərdən keçirilməsi məqsədi ilə hesabatlar mediasiya təşkilatları rəhbərlərinə işçi qaydada göndərilir və mediasiya təşkilatları rəhbərləri bütün dəqiqləşmələri apardıqdan sonra hesabatlar ictimaiyyətə təqdim edilir. 

"Mediasiya sazişlərinin imzalanmasında və mediasiya fəaliyyətinin təşviqində bir çox mediasiya təşkilatlarımızın mühüm rolu var. Bu gün sevindirici haldır ki, ölkə boyu mediasiya təşkilatlarının yaradılması və fəaliyyətinin təmin edilməsi sahəsində işlər aparılır. Ümumiyyətlə, qeyd edərdim ki, mediasiya təşkilatlarının yaranması mediasiya xidmətlərinin keyfiyyətinə də müsbət təsir edir. Odur ki, bu ilki hədəflərimizdə bütün rayonlarda mediasiya təşkilatlarının fəaliyyətə başlaması birinci sıradadır. Bir daha qeyd edim ki, məhz mediatorların sayəsində bu gün biz keyfiyyətli barışıq sazişlərinin imzalanmasına nail oluruq. Digər tərəfdən mediatorlarımız digər sahələrdə də çox aktivdir və onlar davamlı olaraq öz üzərlərində işləyirlər.” - deyə, N. Adilov fikirlərini tamamlayıb.