Müğənni Nadir Qafarzadə mərhum xalq artisti İlhamə Quliyeva ilə virtual duet ifa edib.

Bu barədə Lent.az-a açıqlama verən ifaçı bildirib ki, xalq artistinin illər öncə ifa etdiyi “Unuda bilməzsən” adlı bəstəni lentə aldırıb: “İlhamə xanımın dünyasını dəyişməsinə hələ də inana bilmirəm. Düşünürəm ki, yuxudur. Vəfat etməmişdən qabaq telefonda danışmışdıq, məni evinə dəvət etmişdi. Duet ifa etməyi də planlaşdırmışdıq. Amma əcəl imkan vermədi. Qismətdə dünyasını dəyişəndən sonra onunla virtual duet oxumaq var imiş. Onu da deyim ki, İlhamə xanım sağ olanda bir çoxları onun qarşısında at oynada bilmirdi. Amma indi bəzi şou-biznes nümayəndələrinin ürəyi açılıb. Həmin adamlara demək istəyirəm ki, ixtiyarınız var idisə, sağ olanda nəsə deyərdiniz. Ölünün dalınca pis danışmaq olmaz. Hətta bəziləri miras davasına çıxmağa da cəhd edir. Onun mirası bizə qalan mahnılarıdır. Mən İlhamə xanımın bu mirasına illərdir göz dikmişəm. Düşünürəm ki, onun bu mirası daim bizimlə olacaq. Virtual duet ifa etdiyimizə görə İlhamə xanımın ruhu şad olacaq. Çünki sağlığında mənlə duet oxumağa razılıq vermişdi”.

Qeyd edək ki, “Unuda bilməzsən” adlı bəstənin sözlər Xanım İsmayılqızına, musiqisi Novruz Aslana məxsusdur.