Naftalan Şəhər İcra Hakimiyyətinin və Qərbi Azərbaycan İcmasının birgə təşkilatçılığı ilə Naftalanda yaşayan Qərbi Azərbaycandan olan soydaşlarımızla görüş keçirilib.
AZXEBER.COM xəbər verir ki, görüşdə Qərbi Azərbaycan İcmasının Nəzarət-Təftiş Komissiyasının sədri, Azərbaycan Ağsaqqallar Şurasının sədr müavini, professor Vahid Novruzov, Naftalan Şəhər İcra Hakimiyyəti başçısının müavini Arzu Məmmədov, Qərbi Azərbaycandan deportasiya edilmiş bir qrup soydaşlarımız, ziyalılar iştirak ediblər.
Professor Vahid Novruzov Qərbi Azərbaycan İcmasının əsas məqsədi və fəaliyyət istiqamətləri barədə geniş məlumat verib. Qeyd edib ki, zorla ata-baba yurdlarından didərgin salınmış Qərbi azərbaycanlıların doğma torpaqlarına qayıdışı həm tarixi ədalətin bərpası, həm də milli qürurun təcəssümü kimi qaçılmaz və təmin olunmalı bir hədəfdir. Bu istiqamətdə, möhtərəm Prezidentimiz cənab İlham Əliyevin müstəsna xidmətləri xüsusi qeyd olunub. Dövlət başçısının Qərbi azərbaycanlıların haqq işinə verdiyi yüksək diqqət və göstərdiyi dəstək, eləcə də bu sahədə həyata keçirilən məqsədyönlü dövlət siyasəti icmanın fəaliyyətinə böyük ruh yüksəkliyi verir.
Qərbi azərbaycanlılar çıxışlarında Vətən müharibəsində qazanılmış Tarixi Zəfərin yaratdığı ruh yüksəkliyi ilə ata-baba torpaqlarına sülh yolu ilə qayıdacaqlarına sarsılmaz inam ifadə ediblər. Onlar bu qayıdışı həm tarixi ədalətin bərpası, həm də milli qürurun təcəssümü kimi qiymətləndiriblər.
Tədbirdə Qərbi Azərbaycandan olan soydaşlarımızın və onların varislərinin bir qrupu tərəfindən edilən müraciətlər əsasında onlara Qərbi Azərbaycan İcmasının rəsmi üzvlük vəsiqələri və xüsusi döş nişanları təqdim olunmuşdur. Bu təşəbbüs, Qərbi Azərbaycan İcmasının soydaşlarımız arasında həmrəyliyi gücləndirmək, milli-mənəvi dəyərlərin qorunması və gələcək nəsillərə ötürülməsi istiqamətində apardığı məqsədyönlü fəaliyyətin bariz nümunəsidir.
Sonda Qərbi Azərbaycan İcması adından iştirakçılara hədiyyə təqdim edilib.
