Bir neçə gündür Məhəmməd Əmin Rəsulzadə ilə bağlı fikirlərinə görə tənqid olunan gənc deputat Naqif Həmzəyev bu gün parlamentin iclasından öncə jurnalistlərə açıqlama verib.
Millət vəkili açıqlamasında Rəsulzadəni təhqir etmədiyini vurğulayıb: “"Mən dəfələrlə qeyd etmişəm ki, burda heç bir müsahibədən söhbət gedə bilməz. Çox təəssüflər olsun ki, orada olan dialoq təhrif olunmuş şəkildə ictimaiyyətə çatdırılıb. Mən yenə də deyirəm mən tək və yeganə liderim var, o da ümummilli lideri Heydər Əliyevdir. Mən Məhəmməd Əmin Rəsulzadəni təhqir etməmişəm və təhqir etmək də fikrim yoxdur. Mən başa düşmürəm ki, söylədiyim fikirlərə, yoxsa dediyim cümlələrə görə günahlandırılıram. Bir daha bəyan edirəm ki, mənim tək liderim var, o da ümummilli liderimiz Heydər Əliyevdir. Etmədiyim əmələ görə heç bir məsuliyyət daşımıram. Məhəmməd Əmin Rəsulzadəni təhqir etməmişəm və etmək fikrim də yoxdur. Əsası Həsən bəy Zərdabi tərəfindən qoyulmuş medianın bəzi nümayəndələri bu peşəni biznes maraqlarına qurban veriblər”.
"Elə isə Rəsulzadə sizin üçün kimdir?" sualına gəlincə... "Mən dedim, mənim tək və yeganə bir liderim var, o da ümummilli lider Heydər Əliyevdir. Rəsulzadə tarixi şəxsdir. Tarixi şəxslərə bizim hörmətimiz var. Gəncə şəhərində ilk növbədə Gəncənin adı ilə bağlı olan Nizami Gəncəvi, Məhsəti Gəncəvinin, Mirzə Şəfi Vazehin yaradıcılığı dərindən öyrənilir və onların xatirələrinin əbədiləşdirilməsi üçün lazımi addımlar atılır dövlətimiz tərəfindən. Lazım gələrsə, digər işlər də görüləcək".
N.Həmzəyev informasiya terrorunun qurbanına çevrildiyini bəyan edib: “Mən fikrimi dedim, mənim açıqlamam da kifayət edir. Xahiş edirəm siz də doğru, düzgün və tərəfsiz bu informasiyanı ictimaiyyətə çatdırasınız".
Deputat Milli Məclisin İntizam komissiyasının sədri Ağacan Əbiyevin onun barəsində səsləndirdiyi fikirlərə belə reaksiya verib: “Məni provokasiyalara çəkməyin. YAP bu məsələyə münasibət bildirib və qeyd olunub ki, prosedur necə olur”.
Qeyd edək ki, Naqif Həmzəyevin ADR-in banisi Məhəmməd Əmin Rəsulzadə ilə bağlı səsləndirdiyi fikirlərdə parlamentin bu keçirilən iclasında da diqqət çəkilib. Mİllət vəkili Fazil Mustafa deputatın fikirlərinə parlamentin qiymət verməsi məsələsini gündəmə gətirib. O qeyd edib ki, təhqir yolverilməzdir: “Deputat həmkarımız tərəfindən Məhəmməd Əmin Rəsulzadə barəsində səsləndirilən fikirlər cəmiyyətdə ajiotaj yaradıb. Tarixi şəxslər haqqında ziddiyyətli fikirləri hər kəs söyləyə bilər. Amma elə şəxslər var ki, onlar dövlətin qurucularıdır. Kimsə bu qurucuları qəbul etmirsə, demək ki, onun qurduğu dövlətdə yaşamaqdan da məmnunluq hiss etmir. Biz Cəbhə dövründə indiki hakimiyyətə qarşı kəskin mübarizə aparmışıq. Amma Elçibəy vəfat edəndə Heydər Əliyevin onun məzarının başında dayanması cəbhəçilərin böyük əksəriyyətinin fikirlərini 180 dərəcə dəyişdi”.
Birinci vitse-spiker Ziyafət Əsgərov deputatın fikirlərinə belə cavab verib: “Naqif müəllimin müsahibəsini oxudum. Deyib ki, belə bir şey deməyib. Hər halda, bu məsələ araşdırılmalıdır. Araşdırılmamış ittiham irəli sürmək düzgün deyil. Müxbir deyib ki, deyib, Naqif Həmzəyev isə deyir ki, deməyib. Ona görə də qəzet redaksiyası və Naqif Həmzəyev oturarlar bir arada, bu məsələni müzakirə edərlər”.
APA
