"Azərbaycanda nazir müavininin sabit tarif təklifi tamamilə mənasız və absurd təklifdir. Bu haqda necə fikirləşib, nədən bu qərara gəliblər, bunu indiyənə qədər anlaya bilmirəm".
Bu sözləri AZXEBER.COM-a açıqlamasında işıq və qaz ilə bağlı sabit tarif təklifi ilə danışn iqtisadçı ekspert, REAL partiyasının sədri Natiq Cəfərli deyib.
Ekspert bildirib ki, işıq və qazda limitlərin ləğv gözlənilən məqamda belə qərarın verilməsi gözlənilməzdi:
"Bizim gözləntimiz işıqda və qazda limitlərin ləğv olunmasi idi. Çox güman ki, limitlər ləğv olunacaq. Amma ehtimal ki, müxtərif tarif paketləri də əlavə olunacaq ki, bu da istər-istəməz qiymət artımına səbəb olacaq".
İqtisadçı qeyd edib ki, dövlət şirkətinin elektrik və ya qaz xəttinin çəkilməsinə xərclədiyi vəsaiti abonentdən aylıq şəkildə alması əsas hədəfdir:
"Təklif ondan ibarətdir ki, dövlət şirkəti qazın və yaxud da işığın elektrik enerjisinin mənzilə qədər çəkilməsinə vəsait xərcləyir, sayğaç quraşdırır.
Amma siz evdə yaşamırsınızsa, o infrastruktura çəkilən xərci sabit tariflə ödəməlisiniz. İndi bu 5 manat olacaq, 1 manat olacaq bilinmir, amma hər halda aylıq əlavə işlətdin-işlətmədin qaza və işığı elektrik enerjisinə pul verməli olacaqsınız. Bu çox mənasız bir yanaşmadır, çünki o infrastruktur üçün vəsait daha çox dövlət büdcəsindən ayrılır. Və dövlət büdcəsindən də biz hamımız vətəndaş olaraq vergilərimizlə pay sahibiyik və bizim vergiləri hesabına da o infrastruktur çəkilir, qurulur".
Natiq Cəfərli deyib ki, vətəndaşlar keyfiyyətli xidmət istəyir:
Bundan başqa, bizim üçün istehlakçı olaraq fərqi nədir ki, dövlət şirkəti olsun ya özəl şirkəti olsun, biz daha keyfiyyətli xidmət almaq istəyirik, mal və məhsul almaq istəyirik. İstehlakçı olaraq bizim üçün təbii inhisarçıların olmasının o qədər də əhəmiyyəti yoxdur. Sadəcə problem odur ki, bizim alternativimiz yoxdur. Yəni təbii inhisarçılar elektrik, su və qazın qiymətlərini, tarifləri istədiyi qədər artıra bilirlər. Bizim alternativimiz yoxdur ki, başqa bir təchizatçıya müracət edək.
Amma təklif olunan məntiqi götürsək, ki, məsələn, biznesdə də elə davranılmaldır? Məsələn, kimsə mağaza tikir, ora infrastruktur qurur, ora pul xərcləyir və mağazaya kimsə daxil olur. Heçnə almadan mağazadan çıxan olduğu halda onun qarşısını kəsib, mən mağazama pul xərcləmişəm, buraları tikmişəm, nə olsun heçnə almamsan? Heç olmasa kasaya 5 manat və 1 manat ödəniş elə. Yəni bu aşağı yuxarı belə yanaşmadır. Çox məntiqsiz, yanlışdır. Ümid edirəm ki, bu təklif keçməyəcək".
Qeyd edək ki, Azərbaycanda mənzili olan, amma orada yaşamayan vətəndaşlar elektrik enerjisini sabit tariflə ödəyəcəklər.
Bunu energetika nazirinin müavini Samir Vəliyev Milli Məclisin Təbii ehtiyatlar, energetika və ekologiya komitəsinin iclasında bildirib.
Günel Hüseynli
