"Neftçi” rəhbərliyi azarkeşlərlə iş üzrə əlaqələndirici Kənan Hənifəyevi tutduğu vəzifədən uzaqlaşdırıb.
Lent.az-ın futbolinfo.az-a istinadən məlumatına görə, bu barədə paytaxt klubunun azarkeşlərinin "Facebook" səhifəsində məlumat verilib. Onun vəzifəsindən azad edilməsinə Topaz Premyer Liqanın 24-cü turunun "Sumqayıt”a qarşı matçında bəzi azarkeşlərin klub rəhbərliyini və məşqçi heyətini istefaya səsləməsi səbəb göstərilir.
Qeyd edək ki, "Neftçi" "Sumqayıt"a 0:2 hesabı ilə məğlub olub. Bununla da inların Premyer Liqada bu mövsümü medalsız başa vuracağı qətiləşib. "Bəli, artıq son iki məğlubiyyətin günahkar tapılıb və bundan sonra komandamız "qələbələri sıralayacaq”. Demə, ən böyük günahkar klubumuzun azarkeşlər üzrə kordinatoru Kənan Hənifəyev imiş. Bəli, dünən (srağagün – red.) məhz onun meydana buraxdığı 11-lik azarkeşlərimizi məyus etdi. Məhz Kənan qapıya Baykoviçi deyil, Vaylonu qoymuşdu. Hətta bu da azdır. 2-ci hissədə Kənan meydana çıxmalı, Cavidin göyqurşağına göndərdiyi topu ordan endirib Fərhadın qapısından keçirməli idi. Bax budur bizim biabırçı idarəçilik, biabırçı rəhbərlik” – deyə "Neftçi” azarkeşlərinin "Facebook" səhifəsindəki paylaşımda bildirilib.
"UEFA-nın lisenziyalaşdırma tələblərindən biri azarkeşlərlə iş üzrə rəsmi klub koordinatorunun olmasıdır. Bu, ştatlı vəzifədir. Mövsümə 15-16 legioner dəvət edən və Avropaya can atan klub bunları nəzərə almalıdır. "Neftçi" kimi köklü klubdan isə deyirlər ki, "belə bir vəzifəyə ehtiyacımız yoxdur”. Bu, klubun azarkeş-fanata verdiyi əsl "dəyər"dir”.
Bu sözləri Qol.az saytına açıqlamasında "Neftçi”nin sabiq vitse-prezidenti Tahir Süleymanov deyib.
O, komandanın bəzi fanatlarının ötən bazar günü "Sumqayıt”la oyunda səsləndirdiyi "istefa” şüarına görə klubun azarkeşlərlə iş üzrə koordinatoru Kənan Hənifəyevin tutduğu vəzifədən uzaqlaşdırmasını tənqid edib.
Tahir Süleymanov deyib: "Belə görünür ki, tarixi anti-rekordların fonunda indiki "Neftçi"i rəhbərliyinə azarkeşlərin stadiona gəlməsi sərf etmir. Hətta UEFA bayrağı altında keçirilən görüşlərdə digər klub rəsmiləri ilə yanaşı azarkeşlərlə iş üzrə koordinatorun da fəaliyyəti UEFA nümayəndəsinin nəzarətində olur və əlaqələndirilir”.
Bəs, azarkeşin səsləndirdiyi istefa çağırışına görə klubun nümayəndəsinin vəzifədən çıxarılması peşəkarlıq və mənəvi baxımdan nə dərəcədə doğrudur?
Tahir Süleymanovun bu suala cavabı belə olub: "Neftçi" xalqın, azarkeşindir, kimlərinsə şəxsi klubu deyil. Heç kim cibindən "Neftçi"yə sponsorluq etmir. 80-yaşlı köklü klubun borcudur ki, daimi nəticələr göstərsin və azarkeşlərini sevindirsin. 8 komandalı çempionatdın yekununa 4 tur qalmış 14 (!) məğlubiyyət alan kluba cavabdeh şəxslər "istefa" sözünü eşitmədən özləri getməlidirlər.
3 ilə yaxındır dağıdıcı təfəkkürlə "Neftçi" kimi klubu idarə edənlər futbolu, mənəviyyatı, azarkeşi deyil, ancaq özlərini düşünürlər. Milyonlarla vəsaitin havaya sovurulmasının hesabatını azarkeş-fanat deyil, "Neftçi"yə cavabdehlər verməlidir. Gede biabırçılığından sonra "Neftçi" tarixi uğurlar qazandığı dönəmdə belə mövsüm ərzində bu sayda legionerdən istifadə etməyib”.
