İsrailin Baş naziri Benjamin Netanyahu bildirib ki, İran artıq nə uranı zənginləşdirmək, nə də ballistik raketlər istehsal etmək imkanına malikdir.
The Times of Israel-in yaydığı məlumata görə, o, fevralın 28-də ABŞ və İsrailin İrana qarşı başladığı hərbi kampaniyadan sonra ilk dəfə Yerusəlimdə keçirilən canlı mətbuat konfransında çıxış edərək deyib: "Bu gün İranın nə uranı zənginləşdirmək, nə də ballistik raketlər istehsal etmək imkanı var. Ancaq onları hədəfə almışıq, bunları istehsal edə bilməyəcəklər”.
Netanyahu bildirib ki, bu imkanlar məhv edilməkdə davam edir: "Biz bu qabiliyyətləri darmadağın etməyə davam edirik. Onları toza, külə çevirəcəyik.” O əlavə edib ki, İran "indiyə qədər olduğundan daha zəifdir”, İsrail isə regionda güclü dövlətdir və "bəzilərinə görə dünya gücüdür”.
Netanyahunun Yerusəlimdə çıxışından bir neçə saat sonra İran İsrailə doğru bir sıra raketlər atıb və nəticədə paytaxtda və ölkənin digər bölgələrində həyəcan siqnalları səslənib.
İran ötən ay ABŞ və İsrail tərəfindən başladılan bombardman kampaniyasına cavab olaraq region üzrə raket və pilotsuz uçuş aparatları ilə hücumlar həyata keçirir. Bu kampaniyanın məqsədi İran rəhbərliyini zəiflətmək, həmçinin onun nüvə və ballistik raket proqramlarını məhv etməkdir.
Netanyahu ingilis dilində etdiyi çıxışında bildirib ki, "Rising Lion” əməliyyatı zamanı iyun ayında raketlər və nüvə infrastrukturunun böyük hissəsi məhv edilib. Lakin hazırda hədəf raketlərin və nüvə silahlarının hazırlanması üçün istifadə olunan komponentləri istehsal edən zavodlardır.
