Populyar estrada müğənnisi Azəri Günel ötən gün paytaxt restoranlarının birində ailə üzvlərinin əhatəsində 26 yaşını qeyd edib.
Milli.Az xəbər portalının məlumatına görə, bu haqda Trend Life-a müğənninin bacısı Müşərrəf Zeynalova bildirib: "Yalnız ailə üzvlərimiz və yaxın qohumlarımızla birgə əziz bacımın ad günü keçirdik. Amma gözlənilməz qonağın Günelə təbrik etmək üçün İstanbuldan Bakıya gəlməsi hamımız üçün xoş sürpriz oldu. Söhbət onun nişanlısı İnanc Başəyməzdən gedir. Günel çox sevindi onun gəlişinə. Ad günü çox gözəl abu-havada gecəyarısına qədər davam etdi".
Günel özü də ad günündə ona diqqət göstərənlərə təşəkkürünü bildirib: "Sevdiklərimin əhatəsində yığcam ailə məclisi keçirsəm də pərəstişkarlarım tərəfindən çoxlu sayda hədiyyə və təbrik mesajları almışam. Hələ Facebook sosial şəbəkəsində olan dostlarımı demirəm. O qədər xoş sözlər yazıblar ki, gərək hər birini ayrı-ayrılıqda cavablandırım. Onlara səslənib demək istəyirəm ki, varlıqlarını hiss etdirdiklərinə görə sağ olunlar. Daim çalışacağam ki, etimadlarını doğruldum".
