Azərbaycanın dövlət müstəqilliyinin növbəti ildönümü Nyu-Yorkda qeyd edilib.

AZXEBER.COM-un verdiyi xəbərə görə, bu barədə Türkiyə KİV-ləri yazıb.Məlumata əsasən, Nyu-Yorkdakı Azərbaycan Assosiasiyası tərəfindən Uoll-Stritdə yerləşən “Bowling Green Park”-da təşkil olunan bayram tədbirinə Azərbaycan diasporası nümayəndələri ilə yanaşı Türk-Amerika Dərnəkləri Federasiyasının təmsilçiləri də qatılıblar.Tədbirdə Amerika Birləşmiş Ştatlarının və Azərbaycan Respublikasının dövlət himnləri səsləndiriləndən sonra Azərbaycan Nyu-York Assosiasiyasının rəhbəri Ercan Yerdelenli çıxış edib və Azərbaycanın müstəqilliyinin 22-ci ilini türk diasporu ilə birlikdə qeyd etdikləri üçün böyük fəxr hissi keçirdiyini dilə gətirib.Keçirilən bayram tədbirləri çərçivəsində hər il olduğu kimi bu il də “Bowling Green Park”-dakı bayraq dirəyinə Azərbaycan bayrağının sancıldığını bildirən E.Yerdelenli deyib: “Burada keçirilən bayram mərasimi Türk diasporunun gücünün ermənilərə göstərilməsidir. Nə qədər ki Qarabağ torpaqları Azərbaycana geri verilməyib, heç bir azərbaycanlının gözünə rahat yuxu getməyəcək. Bizi bu günümüzdə tək qoymayan və dəstək verən türk diasporu təmsilçilərinə öz minnətdarlığımızı bildiririk.E.Yerdelenli onu da qeyd edib ki, bu il ilk dəfə olaraq, Nyu-Cersi ştatının senatı tərəfindən Azərbaycanla münasibətlərin əhəmiyyətinə diqqət verilməsinin vacib olduğunu qeyd edən sənədin qəbul edilməsi olduqca təqdirəlayiq haldır.Mərasimdə çıxış edən Türk-Amerika Dərnəkləri Federasiyasının başçısı Ali Çınar rəhbərlik etdiyi federasiyanın Azərbaycan diasporu ilə əlaqələrinin genişləndirilməsi məqsədilə işlərin görüldüyünü qeyd edib.“Uoll-Stritdə Azərbaycan bayrağının dalğalanmasından qürur hissi duyuruq. Ulu öndər Atatürkün də dediyi kimi, sizin məqsədiniz bizim məqsədimiz, sizin xoşbəxtliyiniz bizim xoşbəxtliyimizdir! – A.Çinar çıxışında vurğulayıb.Bayram tədbirindəki çıxışlardan sonra Azərbaycan bayrağı dirəyə sancılaraq, yüksəklərə qaldırılıb.