Vitamin və mineral əlavələri sağlamlığı dəstəkləmək məqsədilə geniş istifadə olunur. Lakin mütəxəssislər xəbərdarlıq edirlər ki, bu əlavələrin düzgün vaxtda və düzgün kombinasiyada qəbul edilməməsi onların mənimsənilməsini azalda, bəzi hallarda isə təsirini zəiflədə bilər.
AZXEBER.COM xəbər verir ki, mütəxəssislərin sözlərinə görə, vitamin və mineralların bir-biri ilə qarşılıqlı təsirini nəzərə almaq vacibdir.
Birlikdə qəbul edilməsi tövsiyə olunmayan əlavələr:
Kalsium və dəmir
Kalsium dəmirin bağırsaqlardan sorulmasını azalda bilər. Bu səbəbdən dəmir preparatının kalsium əlavələri və ya yüksək kalsiumlu qidalarla eyni vaxtda qəbul edilməməsi məsləhət görülür. Onların arasında ən azı 2 saat fasilə saxlamaq tövsiyə edilir.
Dəmir və sink
Bu iki mineral yüksək dozada eyni vaxtda qəbul edildikdə bir-birinin sorulmasına mane ola bilər. Uzunmüddətli istifadə zamanı həkim məsləhəti ilə qəbul edilmələri daha məqsədəuyğundur.
Maqnezium və bəzi antibiotiklər
Maqnezium bəzi antibiotiklərin orqanizm tərəfindən sorulmasını azalda bilər. Bu səbəbdən antibiotik qəbul edən şəxslər maqnezium əlavəsini fərqli saatlarda qəbul etməlidirlər.
Birlikdə qəbul edilməsi faydalı hesab olunan vitaminlər
D vitamini və kalsium
D vitamini kalsiumun bağırsaqlardan sorulmasını artırır. Buna görə də bu iki əlavənin birlikdə istifadəsi sümük sağlamlığı üçün daha effektiv hesab edilir.
C vitamini və dəmir
C vitamini xüsusilə bitki mənşəli dəmirin sorulmasını artırır. Dəmir preparatını bir stəkan portağal şirəsi və ya C vitamini ilə birlikdə qəbul etmək onun təsirini gücləndirə bilər.
Vitamin D və maqnezium
Maqnezium orqanizmdə D vitamininin aktiv formaya çevrilməsində rol oynayır. Bu səbəbdən hər iki maddənin kifayət qədər qəbul edilməsi vacib sayılır.
Vitamin qəbul edərkən bunlara diqqət edin
* Yağda həll olan A, D, E və K vitaminlərini tərkibində sağlam yağ olan qida ilə qəbul etmək onların sorulmasını yaxşılaşdırır.
* Suda həll olan C vitamini və B qrupu vitaminləri günün istənilən vaxtında qəbul oluna bilər, lakin bəzi insanlar B vitaminlərini səhər qəbul etdikdə özlərini daha enerjili hiss edirlər.
* Tövsiyə olunan gündəlik dozanı aşmaq sağlamlığa əlavə fayda vermir, əksinə, bəzi hallarda zərərli ola bilər.
Şahanə Ziyad
