Azərbaycanda keçirilən növbədənkənar parlament seçkilərinin ilkin nəticələri açıqlanıb.
AZXEBER.COM xəbər verir ki, Mərkəzi Seçki Komissiyasını açıqladığı ilkin nəticələrə əsasən siyahıda ən gənc deputat 29 yaşlı Mahir Süleymanlı olacaq.
O, 56 saylı Şabran-Xaçmaz seçki dairəsindən namizədliyini irəli sürüb. İlkin nəticələrə görə gənc namizəd 10 min 131 səs toplayıb. Mahir Süleymanlı ən yaxın rəqibini 8 min səsə yaxın qabaqlayır.
Mahir Süleymanlı 28 fevral 1995-ci ildə anadan olub. O keçmiş deputat Tahir Süleymanlının oğludur.
Daha bir gənc deputat isə Mircəlil Qasımlıdır. O 19 mart 1992-ci ildə anadan olub. 32 yaşlı Mircəlil Qasımlı 123 saylı Kəlbəcər seçki dairəsində liderdir. O 13015 səs toplayıb və ən yaxın rəqibini 8 min səs qabaqlayır. Mircəlil Qasımlı isə "Bakı Məişət Maşınları” ASC-nin sədridir. "Global Construction” MMC-nin təsisçisi və idarə heyətinin sədri Miryusif Mahmudovun kürəkənidir. O, işğaldan azad olunmuş rayonlardan birində xüsusi nümayəndəlikdə çalışıb.
Daha bir gənc 11 saylı Binəqədi-Qaradağ seçki dairəsindən uğur qazanan 31 yaşlı Səbinə Xasayevadır.
O, 1993-cü il martın 30-da Bakı şəhərində doğulub. Səbinə Xasayeva 2-ci dəfədir ki, deputat seçilir.
