Mayın 1-də Azərbaycanda aparılan ictimai-siyasi, iqtisadi, hüquqi və kadr islahatlarının növbəti mərhələsi həyata keçirildi.
Prezident İlham Əliyev Milli Məclisin razılığı ilə Kamran Əliyevin baş prokuror təyin olunması ilə bağlı sərəncam imzaladı.
Bu posta Korrupsiyaya Qarşı Mübarizə Baş İdarəsinin rəisinin gətirilməsi Azərbaycanda korrupsiyaya qarşı aparılan ciddi mübarizənin təzahürüdür.
Yeni baş prokuror Milli Məclisin iclasında çıxışı zamanı siyasi, hüquqi islahatların, eləcə də, aparılan kadr islahatlarının ölkəmizin yeni inkişaf mərhələsinə keçidini şərtləndirdiyini qeyd edib.
Azərbaycan Azad Respublikaçılar Partiyasının sədri Kamil Seyidov AZXEBER.COM-a açıqlamasında prokurorluq sistemində dəyişikliklərin islahatların davam olduğunu deyib: "Bu prezident İlham Əliyevin hüquq sahəsində başlatdığı islahatların davamıdır. Eyni zamanda islahatların davamlı olacağının anonsudur. Yeni təyin olunan baş prokuror çox təcrübəli, dövlətçi, savadlı insandır.
Mən əminəm ki, o bu işin də öhdəsindən layiqli şəkildə gələcək. Çünki onun əvvəlki çalışdığı vəzifə də çox strateji vəzifə idi. Kamran Əliyevin potensialı, savadı, düşüncə tərzi, hadisələrə münasibəti onu deməyə əsas verir ki, bu yerində verilən qərardır. Əminəm ki, bu islahatlar davamlı olacaq və korrupsiyaya qarşı mübarizə bundan sonra daha sərt formada davam edəcək".
Partiya sədri son zamanlar Dövlət Təhlükəzlik Xidmətinin apardığı əməliyyatlar haqda da danışıb.
O deyib ki, bu tədbirlər bütün icra başçılarına dərs olmalıdır: "Bu həbslər ölkədə korrupsiyaya, məmur özbaşınalığına qarşı aparılan tədbirlərin tərkib hissəsidir. Bəzi icra başçıları özlərini padşah kimi aparırlar, heç kimi saymırlar, sakinləri aşağılayırlar. Hətta iş o yerə çatıb ki, rayon insanları icra başçılarını toxunulmaz hiss edirlər. Dövlət başçısı hər dəfə deyir ki, dövlət məmuru xalqın qulluğunda durmalıdır, insanları dinləməli, yardım etməlidir. Hesab edirəm ki, bu həbslər davamlı olmalıdır. Özündən başqa heç kimi qəbul etməyən icra başçıları həbs edilməlidir. Köhnə təfəkkürlü insanlar getməlidir, yeni kadrlara şans verilməlidir. Biz partiya olaraq bu addımları yüksək qiymətləndiririk, alqışlayırıq".
