Bu sözləri AZXEBER.COM-a açıqlamasında politoloq Tofiq Abbasov Paşinyanın İrana səfərini şərh edərkən deyib.
O, qeyd edib ki, Ermənistan və İran xarici siyasət və ticarət sahəsində özlərinin yaxşı dövrünü yaşamırlar:
"Bu səfərin əsas mahiyyətindən danışaq. Təbii ki, burada həm İran, həm Ermənistan – bunlar qonşu ölkələrdir, ikitərəfli münasibətləri var. Onlar da bir çox vacib sahələri əhatə edir. Onların ortaq layihələri də var, yol tikintisi, tunellər, enerji sektoru və s. Belə səfərlər əsanasında nazirliklərin nümayəndələri bir araya gəlirlər, konfranslar da keçirilir. Amma əsas məsələ liderlərin görüşüdür. Hesab edirəm ki, bir qədər Ermənistanın şəraitinə, İranın özünün də şəraitinə baxsaq, görərik ki, onlar xarici siyasət və ticarət sahəsində bir o qədər də özlərinin yaxşı dövrünü yaşamırlar, çətinlikləri çoxdur. Amma istəyirlər ki, boşluqları doldursunlar”.
"O ki, qaldı Ermənistanın gözləntilərinə, düşünrəm ki, Ermənistan özünü şimal-cənub nəqliyyat dəhlizinin vacib bir bəndi kimi təsdiqləsin. Təsadüfi deyil ki, istənilən böyük formlarda, konfranslarda Paşinyan iştirak edərək bildirir ki, guya şimal-cənub dəhlizi Ermənistanın olmamasında iflasa uğrayacaq. Guya Ermənistan bu layihədə olmasa, layihə çətin olacaq. Amma əslində bu, xülyadır. Çünki şimal-cənub dəhlizini hələ avropalılar təklif edəndə bildirmişdilər ki, onlar üçün ən önəmli məsələ Rusiya-Azərbaycan-İran vasitəsilə həm Fars körfəzinə çıxsınlar, həm daha uzaq Şərqə. Bunun da nəqliyyat məsələsində böyük rolu ola bilər.
Düzdür, burada İran prosesi ləngidir, ancaq Ermənistan heç vaxt Azərbaycan olan yerdə bu layihədə vacib rolunu tuta bilməz. Birincisi, Ermənistanın nəqliyyat strukturu çox zəifdir, digər tərəfdən yolları bərbad vəziyyətdədir. Ermənistan yollarında da geoloji baxımdan mühit mürəkkəbdir”.
Politoloq həmçinin qeyd edib ki, Ermənistan investisiya baxımından çox zəifdir:
"İndi Ermənistan bilməlidir ki, sənin istəyinlə imkanların üst-üstə düşmürsə, niyə ictimai fikri çaşdırırsınız? Ermənistan investisiya baxımından çox zəifdir, ölkənin dövlət borcları, bildiyimə görə, 8 milyardı ötmək üzrədir. Baxmayaraq ki, özləri 3 milyarddan artıq deyir. Digər tərəfdən də İranın elə bir investisiya imkanları yoxdur ki, desin ki, mən bu prosesin maliyyə yükünü üzərimə götürürəm. Amma Ermənistanın ağılı olsaydı, Azərbaycanın təkliflərini qəbul edərdi. Məğlub ölkə kimi ona qalib ölkədən əlverişdi təkliflər gəlir. Amma Ermənistan bu məsələdən qorxur. Onlar özləri iblis libasına giriblər və sağlam təşəbbüslərə yox deyirlər. Amma məsələ burasındadır ki, Azərbaycan Ermənistanın iştirakı olmadan bütün layihələri həyata keçirib. Bunlarla da Azərbaycanın nüfuzu dünyada artmaqdadır”.
Aydın Nuri
