İrandakı prezident seçkilərində qalib gələn və ölkənin yeni prezidenti olan azəri türkü Məsud Pezeşkian qələbə nitqində rejimə sadiq olduğunu bəyan edərək, bunu gözləyən kütlələr arasında sual işarəsi yaradıb.
AZXEBER.COM xarici mətbuata istinadən xəbər verir ki, analitiklərin fikrincə, manevr imkanları məhdud olan Pezeşkian mühafizəkarların nəzarəti altında olan inzibati mexanizmin dəstəyini almalı olacaq və ölkə siyasətində ciddi dəyişiklik etmək onun üçün çətin olacaq.
Daha əvvəl hicab və Qərblə münasibətlərlə bağlı mötədil açıqlamalar verən və internetə qoyulan məhdudiyyətləri aradan qaldıracağına söz verən Pezeşkiyanın 2021-ci il seçkilərində iştirakına icazə verilməyib.
Qələbəsi ilə uzun müddət siyasətə inamını itirmiş bəzi iranlılarda dəyişiklik ümidi yaradan yeni prezident dünən gecə etdiyi zəfər nitqində dini lider Ayətullah Əli Xameneiyə təşəkkür edərək bu fikirləri səsləndirib:
"Onun rəhbərliyi olmadan mənim adım seçki bülletenində olmazdı, sayəsində bu nöqtəyə gələ bildik”.
İranda əsas qərar verici qüvvə olan Xamneyi yeni prezidenti təbrik edən mesajında Pezeşkiyanın mərhum İbrahim Rəisinin yolu ilə getməsini istədiyini bildirib.
Qeyd edək ki, Yaxın Şərq ekspertləri Pezeşkianın hakimiyyəti dövründə İranın xarici siyasətində ciddi istiqamət dəyişikliyi gözləmirlər.
