"Vətəndaşlara polis rəislərinə birbaşa müraciət etmə imkanı verilməsi ictimai etimad üçün yeni bir mərhələ sayıla bilər. Polis-vətəndaş münasibətlərində yeni mərhələyə keçidi ifadə edən polis rəislərinə birbaşa müraciət "mexanizmi" təkcə ünsiyyət kanalının sadələşdirilməsi deyil, həm də ictimai ehtimadın möhkəmləndirilməsi və hüquq-mühafizə orqanlarının inkişafı baxımından əhəmiyyət kəsib edir".
Bu sözləri AZXEBER.COM-a açıqlamasında Daxili İşlər Nazirliyi yanında İctimai Şuranın sədri Əliməmməd Nuriyev vətəndaşların polis rəislərinə birbaşa müraciət edə bilmələri haqda danışarkən deyib.
Nuriyev bildirib ki, vətəndaş vasitəçi olmadan öz problemini ünvanına çatdırdıqda ona qulaq asıldığını düşünür:
"Vətəndaşların polis rəislərinə birbaşa müraciət etmə imkanı verilməsi, vətəndaşın səsini birbaşa qərarverici şəxsə çatdırılması imkanını təmin edir. Eyni zamanda insan öz problemlərini vasitəçi olmadan ifadə etdikdə o, dinlənildiyini hiss edir və düşünür ki, ona artıq qulaq asırlar. Bu həm hüquq-mühafizə orqanlarına inamı artırır, həm də ictimai nəzəratin effektliyini gücləndirir”.
Əliməmməd Nuriyev həmçinin bildirib ki, birbaşa müraciətlər polis rəhbərliyinə hadisələr barədə birinci mənbədən məlumat əldə etmək imkanı yaradır:
"Polis rəislərinə birbaşa müraciət etmək imkanı rəhbərliyə hadisələr barədə birinci mənbədən məlumat əldə etmək imkanı yaradır. Bu, həm operativ qərar verməni sürətləndirir, həm də formal hesabatların əvəzinə real vəziyyəti daha düzgün qiymətləndirməyə şərait yaradır. Xüsusilə təhlükəsizlik, ictimai asayişin pozulması və korrupsiya halları kimi təxirəsalınmaz mövzularda çevik reaksiyanı təmin edə bilər. Yeni mexanizm vətəndaş cəmiyyətinin hüquq-mühafizə orqanları səhəsində rolunu artırır".
"QHT-lər və media müraciətlərinin məzmunu və həlli prosesinə diqqət yetirsək, bu həm də ictimai hesabatlılıq mədəniyyətinə də töhfə verə bilər” deyən ictimai şura sədri sözünə belə davam edib:
"Vətəndaşların hüququ maarifləndirilməsi bu prosesun bir hissəsi, təbii bir nəticəsidir. Eyni zamanda qeyd etmək lazımdır ki, bu sistem müraciətlərin sayını kəskin artıra bilər. Ona görə də müraciətlərin prioritetləşdirilməsi və filtrasiya mexanizmlərini zəruri edəcək. Əgər bu mexanizm düzgün tətbiq olunacaqsa, inanıram ki, bu olacaqdır. Çünki bu daxili işlər nazirinin birbaşa göstərişidir və yeni idarəetmə proseslərinin hansı nəticə verilməsini nazir daim nəzarətdə saxlayır. Bu addım polis vətəndaş münasibətlərində uzaq məsafə modelindən tərəfdaşlıq modelinə keçidi təmin edəcəkdir. Daxili nəzərət sistemləri güclənəcək, etik davranış standartları yüksələcək, nəzakətli rəftar məmnuniyyətliyin təmin edilməsinə gətirib çıxardacaq. Eyni zamanda bu həm də hüquq-mühafizə orqanlarına ictimai dəstək və siyasi legitimliyini daha da artıracaq".
Günel Hüseynli
