"44 günlük müharibədə qələbənin qazanılmasında Prezident, Ali Baş Komandan İlham Əliyevin xidmətləri danılmazdır. Məhz onun iradəsi, güclü mövqeyi, düzgün zamanı seçməsi və qətiyyət göstərməsi bu qələbənin qazanılmasında əsas rol oynadı”.
Bu sözləri AZXEBER.COM-a açıqlamasında Milli Məclisin deputatı Razi Nurullayev 44 günlük müharibədə qazanılan qələbədən danışarkən deyib.
Deputat qeyd edib ki, İlham Əliyevin Prezidentliyi dövründən başlayaraq Azərbaycan büdcəsinin xeyli hissəsini müasir silahların alınmasına xərcləyirdi:
"Qeyd etmək lazımdır ki, 30 il ərzində ki, torpaqlarımız işğal altında qaldı, belə çıxır ki, Azərbaycan heç də əl-qolunu uzadıb gözləmirdi. İlham Əliyevin Prezidentliyi dövründən başlayaraq Azərbaycan büdcəsinin xeyli hissəsini müasir silahların alınmasına xərcləyirdi. Yadımdadır ki, müxalifət, o cümlədən mən özüm də tənqidi fikirlər səsləndirirdik ki, bu qədər pullar xərclənir, il üstünə il əlavə olunur, amma torpaqlarımızı azad edə bilmirik, bu qədər büdcənin hərbiyə ayrılmasına nə ehtiyac var, əgər biz torpaqlarımızı azad edə bilmiriksə. Mən qələbəmizdən sonra başa düşdüm ki, biz bununla nə qədər səhv etmişik. Bəzən emosiyalara qapılmışıq”.
Deputat bildirib ki, Prezidentin də qeyd etdiyi kimi, artıq Qarabağ problemi həll olunub:
"Əslində biz İlham Əliyevi tənqid edən zaman o gecə-gündüz Qarabağın azad olunması üçün çalışırdı, düşünürdü və konkret addımlar atırdı. Nəticəsini də gördük, Qarabağ azad olundu. Bu gün də Azərbaycan ərazilərinin yerdə qalan hissəsi üzərində özünün suverenliyini bərpa etmək üçün gecə-gündüz çalışır. Müsbət nəticələr də var. Elə sonuncu Soçi görüşündə Prezident İlham Əliyevin Rusiya Prezidentinin üzünə belə bir cümlə işlədərək dedi ki, Qarabağ problemi artıq iki ildir ki, həll olunub, müzakirə etməli bir məsələ yoxdur, artıq bu, iki ildir ki, tarixdir. Bunun özü artıq Azərbaycan Prezidentinin hansı güclü iradəyə malik olduğunun göstəricisidir. Bunu bütün xalq bəyəndi, sevdi və Azərbaycan Prezidentini müdafiə etdi. Azərbaycan Prezidentini bu gün bu məsələlərdə müxalifət də müdafiə edir, öz partiyası da müdafiə edir, xalq da müdafiə edir”.
Deputat Zəfər Günü münasibətilə Prezidenti və Azərbaycan hərbçilərini təbrik etdiyini bildirib:
"Həqiqəti demək lazımdır ki, İlham Əliyev mümkün olmayanı mümkün etdi. Belə bir halda cənab Prezidentə sağ ol demək lazımdır, onu təbrik etmək lazımdır. Mən cənab Prezidenti bu Zəfər Günü münasibətilə təbrik edirəm. Məhz onun qurduğu ordu, onun aldığı silahlar Qarabağı azad etdi. Elə buna görə də, mən Azərbaycan Ordusuna da, Azərbaycanın əsgər və zabitlərinə də, Müdafiə Nazirliyinə də, Sərhəd Qoşunlarına da, Azərbaycan Hərbi Dəniz Qüvvələrinə də, bir sözlə, Azərbaycanın bütün hərbçilərinə ürəkdən təşəkkür edirəm. Nə yaxşı ki, varsınız, nə yaxşı ki, bu gün siz Azərbaycan torpaqlarının, xalqının və müstəqilliyinin keşiyinə dayanmısınız”.
Aydın Nuri
