Xəbər verdiyimiz kimi, Prezident İlham Əliyev sərəncamına əsasən Azərbaycanın dövlət qulluğunda uzunmüddətli səmərəli fəaliyyətinə görə Tələt Tahir oğlu Məcidov 1-ci dərəcəli "Vətənə xidmətə görə” ordeni ilə təltif edilib.
AZXEBER.COM 79 yaşlı məmurun dosyesini təqdim edir:
Tələt Məcidov 23 may 1945-ci ildə Bakı şəhərində anadan olub.
O, 1 avqust 1968-ci ildən 2 iyul 1970-ci ilə qədər SSRİ Xarici İqtisad Əlaqələr üzrə Dövlət Komitəsində Əlcəzair və Suriyada, 2 aprel 1977-ci ildən 23 dekabr 1980-ci ilə kimi isə İraqda tərcüməçi kimi işləyib.
T.Məcidov 14 dekabr 1990-cı ildən 4 mart 1992-ci ilə qədər Azərbaycan Respublikası Prezidentinin İcra Aparatında Prezidentin Xarici siyasət məsələlər üzrə müşavirinin xidmətində məsləhətçi, 4 mart 1992-ci ildən 12 may 1992-ci ilə qədər Azərbaycan Respublikası Prezidentinin İcra Aparatının Xarici əlaqələr şöbəsində Şöbə müdirinin müavini, 12 may 1992-ci ildən 8 iyul 1999-cu ilədək Azərbaycan Respublikası Prezidentinin Xarici siyasət məsələləri üzrə Dövlət müşavirinin xidmətində məsləhətçi və baş məsləhətçi vəzifələrində çalışıb.
2 sentyabr 1999-cu ildən 8 fevral 2005-ci ilə kimi Bakı şəhəri Səbail rayonu İcra hakimiyyəti başçısı vəzifəndə işləyib.8 fevral 2005-ci ildən Azərbaycan Respublikası Prezidentinin Administrasiyasının Kadr məsələləri şöbəsində Şöbə müdiri vəzifəsini daşıyır.
O, dövlət qulluğunda səmərəli fəaliyyətinə görə 22 may 2015-ci ildə "Şöhrət", 22 may 2025-ci ildə isə 1-ci dərəcəli "Vətənə xidmətə görə” ordeni ilə təltif edilib.
