Abbas Abbasova ünvanlanan məktubda “Azerros” Ağsaqqallar Şurasının sədrinin müraciətinə baxıldığı qeyd edilib
Rusiya Federasiyası Prezident Administrasiyasının rəhbəri Sergey İvanov “Azerros” Ağsaqqallar Şurasının sədri Abbas Abbasovun müraciətinə cavab verib.
AZXEBER.COM-un Azərrosun saytına istinadən verdiyi məlumata görə, Sergey İvanov tərəfindən Abbas Abbasov ünvanlanan məktubda “Azerros” Ağsaqqallar Şurasının sədrinin müraciətinə baxıldığı qeyd edilib. Bildirilib ki, bu müraciət daha obyektiv və hərtərəfli qiymətləndirilmə edilməsi üçün Dövlət Dumasına göndərilib. Xatırladaq ki, Rusiya azərbaycanlılarının federal milli-mədəni muxtariyyətinin Ağsaqqallar Şurasının sədri Abbas Abbasov aprel ayının birində Rusiya Liberal Demokrat Partiyasının (LDPR) lideri Vladimir Jirinovskidən Rusiya baş prokuroru Yuri Çaykaya şikayət edib. Abbas Abbasov Yuri Çaykaya yazdığı müraciətində Jirinovskinin Rusiya Dövlət Dumasında Dağlıq Qarabağı Rusiyaya birləşdirmək barədə çağırışından, azərbaycanlıların təhqir etməsindən bəhs edib. “Bu cür məlumatları reportaj şəklində Dövlət Dumasının iclasından KİV vasitəsi ilə yaymaq, şəksiz ki, böyük auditoriyada millətlərarası ədavəti qızışdıran ifadələri səsləndirmək məqsədi daşıyıb”,- deyə Abbas Abbasov vurğulayıb. Jirinovskinin törətdiyi cinayət əməlindən müfəssəl bəhs edən Abbas Abbasov müraciətini aşağıdakı sözlərlə bitirib: “Yuxarıda bəhs edilənlər əsasında xahiş edirəm sözügedən halların yoxlanılmasına başlanılması üçün sərəncam verəsiniz və Rusiya Federasiyasının Cinayət Məcəlləsinin 2 maddəsinin “b” bəndinin əsasında V.V.Jirinovskiyə qarşı cinayət işi qaldırılması məsələsinə baxasınız”.
