Azərbaycanda avtobuslarda qadın sürücülərin də fəaliyyət göstərəcəyinə dair elanlar verilib və müraciətlər qəbul olunur.
Nəqliyyat eksperti Elməddin Muradlı AZXEBER.COM-a açıqlamasında bildirib ki, bu yenilik nəqliyyat xidmətində xüsusi bir hal kimi qiymətləndirilməməlidir.
Ekspertin sözlərinə görə, qadınlar digər sahələrdə olduğu kimi, avtobus sürücülüyündə də özlərini sınaya bilərlər:
"Taksi sürücüsü kimi qadın var, velosiped sürən qadın var, skuter sürən qadın var, motosiklet sürən qadın var. Hətta dünən bir qadına avtoxuliqanlıq etdiyi üçün 15 gün həbs cəzası verildi. Demək istədiyim odur ki, avtobus sürməkdə də hər hansı problem yoxdur. Dəmiryolunda qadın maşinist, aviasiyada qadın pilot var. Avtobus sürən qadın olanda da qeyri-adi bir dəyişiklik baş vermir. Sadəcə olaraq, xanım avtobusu işə salıb bir nöqtədən digərinə sürəcək. Burada xüsusi keyfiyyət dəyişikliyi və ya fövqəladə hadisə gözləmək lazım deyil. Bu, sadəcə olaraq xidmət sahəsi olaraq maraqlıdır və qadınların bu sahəyə cəlb olunması önəmlidir."
Ekspertin sözlərinə görə, hazırda müraciət edənlərin əksəriyyətinin kateqoriyaları uyğun gəlmir:
""Bakubus" qadın sürücülərə təlimlər keçir, onları yetişdirməyə çalışır ki, təcrübəli və peşəkar şəkildə xidmətə başlasınlar. Yəni məqsəd təcrübəsiz, problemli sürücülər deyil, mükəmməl səviyyədə hazırlanmış sürücülərin işə başlamasıdır”.
Oksana Orucova
