Yeni bir araşdırma xərçəng riskinin qadınlarda daha yüksək olduğunu ortaya qoyub.
AZXEBER.COM xəbər verir ki, ABŞ hökumətinin yeni bir araşdırmasına görə, qadınlar çox istifadə edilən müxtəlif kimyəvi maddələrə məruz qaldıqları üçün yumurtalıq xərçəngi və melanoma kimi müəyyən xərçəng növlərinin inkişaf riski altındadırlar.
Xəstəliklərə Nəzarət və Qarşısının Alınması Mərkəzləri (CDC) tərəfindən toplanan məlumatlardan istifadə edən tədqiqatçılar bəzi hormonların səbəb olduğu xərçəng diaqnozu qoyulan qadınların polifluoroalkil maddələrinə (PFAS) məruz qaldığına dair sübutlar tapıb.
PFAS süni kimyəvi maddələr qrupu, uzun ömürlü olduqları üçün "əbədi kimyəvilər" də adlanır. Onlara odadavamlı yapışmayan qablar, ləkəyə davamlı mebel və xalçalar, qırışsız və su keçirməyən paltarlar, kosmetik məhsullar və qablaşdırma kimi bir çox yerdə rast gəlinir. Onlar həmçinin tiroid problemi, piylənmə, məhsuldarlıq problemləri və xərçəng kimi sağlamlıq problemlərinə səbəb olurlar.
Tədqiqat həmçinin xərçəng diaqnozu qoyulmuş qadınlarla qida qablaşdırmasında, boyalarda və fərdi qulluq məhsullarında geniş istifadə olunan fenollara yüksək səviyyədə məruz qalma arasında əlaqəni də ortaya qoyub. Bununla belə, bu kimyəvi maddələrlə kişilərdə xərçəng diaqnozu arasında oxşar əlaqə tapılmayıb.
Tədqiqatçılar müəyyən ediblər ki, xüsusilə PFAS kimyəvi maddələri qadınlarda hormon funksiyalarını poza bilər, hormonla əlaqəli xərçəng ehtimalını artırır. Tədqiqatçıların fikrincə, hormonal aktiv xərçənglər çox yayılıb və müalicəsi çətindir.
Ayşən
