Qarabağın Xocavənd rayonunun Sos kəndinə köçən gənc ailənin üzvü Mətanət "Uzun sözün qısası” podkastında Böyük Qayıdışdan, Qarabağdakı yeni həyatlarından və ailə dəstəyinin əhəmiyyətindən danışıb.
AZXEBER.COM xəbər verir ki, Mətanət bildirib ki, Qarabağa köçdükdən sonra bu torpaqlar üçün darıxan insanların hisslərini düşünərək burada gündəlik həyatı əks etdirən videolar çəkməyə başlayıb.
"Evdə işlər gördükcə fikirləşirdim ki, insanlar bu torpaqlar üçün çox darıxıb. Qarabağda olmasa da, ürəyi bu torpaqlarda olan insanların burada gedən həyatı görməyə haqqı və istəyi var. Elə buna görə də Qarabağda kontentlər yaratmağa başladım”, – deyə o bildirib.
Mətanət bu yolda ən böyük dəstəkçisinin həyat yoldaşı olduğunu vurğulayıb:
"Videoları bacardıqca birlikdə çəkirik. O işlədiyi üçün hər zaman iştirak edə bilmir. Biz bu torpaqlara bir cütlük olaraq gəlmişik və bu həyatı birlikdə qururuq. Dövlətimiz bizə təmirli ev verib, amma o evin içindəki həyatı qurmaq artıq bizim əlimizdədir. Mən də çalışıram ki, paylaşımlarımız cütlük olaraq birlikdə nələr bacara bildiyimizi göstərsin. İki insan əl-ələ verəndə çox gözəl bir həyat yarada bilir”.
