"Əhvalımız yaxşıdır. Fövqəladə nəsə baş verməyib".
AZXEBER.COM sportal.az-a istinadən xəbər verir ki, bu sözləri Belarusun BATE klubunun futbolçusu Stanislav Draqun Çempionlar Liqasının III təsnifat mərhələsinin ilk oyunları çərçivəsində səfərdə "Qarabağ"a minimal hesabla (0:1) qalib gəldikləri oyunu dəyərləndirərkən deyib.
30 yaşlı futbolçu arxayınlaşmadıqlarını, cavab oyununa daha yaxşı vəziyyətdə çıxacaqlarını bildirib: "Biz gücümüzə sahib çıxdıq və belə qələbə qazandıq. Xüsusi sevinc yoxdur. Çünki heç nə həll olmayıb. Cütün cavab oyunu da var, 90 dəqiqəlik ağır mübarizə bizi gözləyir".
Belaruslu yarımmüdafiəçisi "Qarabağ"ın ani səhvdən qol buraxdığını, amma bunun BATE-nin təzyiqindən irəli gəldiyini sözlərinə əlavə edib: "Oyuna yaxşı başladıq. Həyəcanı tez boğduq. Rəqib müdafiədə kobud səhv etdi, topa yiyələnməyi bacardıq və qol vurduq. Futbol səhvlər üzərində qurulub. Amma "Qarabağ"da yüksək səviyyəli futbolçuları və əla baş məşqçisi var".
O bildirib ki, buraxılan qoldan sonra "Qarabağ" təzyiq edib və bu, onların işinə çətinlik törədib: "Qoldan sonra "Qarabağ" məntiqli hücumlar etməyə başladı. Bu da bizə çətin oldu. Lakin müdafiədə etibarlı oynadıq. Buna görə də futbolçulara təşəkkür edirəm".
Draqun vurduğu qolu şərh edib: "Vurduğum qolda müdafiəçilər kobud səhv etdilər. Topu ələ keçirən Siqneviç yaxşı ötürdü və mən də gözəl qol vurdum. O epizodda müdafiəçi səhv etməyə məcbur idi. Bu qolumu müəyyən səbəblərə görə sağlamlığında problemləri olan həyat yoldaşımla qızıma həsr edirəm. Ümid edirəm ki, BATE-nin müsbət nəticəsi onlara yaxşı təsir edəcək. Güclü olmaları üçün dua edirəm".
Belaruslu futbolçu cavab oyunu haqda danışıb: "Borisov Arena"da hər şey sıfırdan başlayacaq. "Qarabağ" Belarusda son döyüşünə çıxacaq. Ancaq biz doğma divarlar arasında gözəl oyun nümayiş etdirmək və qələbə qazanmaq istəyirik".
