26 gündür İstanbulun “Acıbadem” xəstəxanasında koma vəziyyətində olan görkəmli muğam ifaçısı, xalq artisti Qədir Rüstəmovu həkimlər bir neçə dəfə ayıltmağa çalışsalar da, bu səylər nəticə verməyib. Bu barədə sənətkarın həyat yoldaşı Fatma Rüstəmova deyib. O bildirib ki, Qədir Rüstəmovun səhhətində heç bir dəyişiklik yoxdur: “Qədir artıq 26 gündür komadadır. Hələ də vəziyyətində heç bir dəyişiklik yoxdur. Həkimlər bu gün mənə dedilər ki, artıq bu vəziyyətdə olan xəstələr üçün həyata keçirilən son variantdan istifadə olunur. Yəni, bu da nəticə verməsə… Əllərimizi Allaha açıb dua edirik. Hətta ürəyi bir neçə dayanıb, elektroşokla fəaliyyətini bərpa ediblər. Onun əsas problemi beynindədir. Birinci növbədə şüuru özünə qayıtmalıdır, sonrası daha asan olacaq”.F. Rüstəmova bildirib ki, müalicə dövründə sənətkarın bədəninə verilən şüa bəzi yerlərində suluq əmələ gətirib: “Əlləri şişib, müxtəlif yerlərində suluqlar əmələ gəlib. İndi böyrəyi də aparatdadır. Artıq 12 gündür antibiotiklər vurulur. Hələ bir həftədən artıq gözləmək lazımdır”. Sənətkarın həyat yoldaşı həkimlərin 24 saat xəstənin vəziyyətinə nəzarət etdiyini bildirib. O, “Acıbadem” xəstəxanasının mütəxəssislərinin əllərindən gələni etdiklərini deyib.
