AZXEBER.COM xəbər verir ki, görüşdə millət vəkili Qənirə Paşayeva Almaniya fəaliyyət göstərən Azərbaycan və Türkiyədən olan insanlarımızın yaratdıqları diaspor təşkilatları arasında əməkdaşlığın vacibliyini qeyd edib. Millət vəkili Qənirə Paşayeva harada doğulmasından və harada yaşamasından asılı olmayaraq hər bir Türk insanının, diaspor təşkilatlarımızın Xocalı Soyqırımı, Qarabağ həqiqətlərinin dünyaya çatdırılması, bu soyqırımı törədənlərin öz layiqli cəzasını alması üçün birlikdə çalışmalarını sürətləndirmələrinin vacibliyini vurğulayıb. Millət vəkili Qənirə Paşayeva Almaniyada fəaliyyət göstərən, Azərbaycan və Türkiyədən olan insanlarımızın qurduğu diaspor təşkilatlarının koordinasiya olunmuş şəkildə bir-birlərinə sıx dəstək vermələrinin və Türk dünyasını narahat edən bütün problemlərin həllinə dəstək göstərmək üçün bərabər çalışmalarının daha da artırılmasının vacibliyini xüsusi diqqətə çatdırıb. Millət vəkili onlara Daglıq Qarabağ münaqişəsi ilə bağlı son vəziyyət barədə də ətraflı məlumatlar verib və geniş müzakirələr aparılıb. Avropa Türk Birliyinin (ATB) başqanı Erol Yazıçıoğlu Almaniyada fəaliyyət göstərən Azərbaycan diaposr təşkilatları ilə əməkdaşlıq etdiklərini, Azərbaycan həqiqətlərinin yayılması, Azərbaycan mədəniyyətinin Almaniyada daha geniş çatdırılması və təbliği istiqamətində səylərini bundan sonra daha da artıracaqlarını bildirib
və bu istiqamətdə görülən işlər və həyata keçirməyi planlaşdırdıqları layihələr barədə millət vəkilinə məlumatlar verib, təkliflərini səsləndirib. Görüşdə qarşılıqlı maraq doğuran məsələlər ətrafında fikir mübadiləsi də aparılıb. Görüşün sonunda millət vəkili Qənirə Paşayeva Avropa Türk Birliyinin (ATB) başqanı Erol Yazıçıoğluna Azərbaycan həqiqətləri, mədəniyyəti ilə bağlı materiallar hədiyyə edib.
