Qılıncoynadanımız Anna Başta Tokio-2020 Yay Olimpiya Oyunlarına lisenziya qazanıb.
Sablyaçımız bu şərəfə İspaniyanın paytaxtı Madrid şəhərində keçirilən Avropa Olimpiya Təsnifat Turnirində nail olub.
Qrup mərhələsində keçirdiyi altı görüşdən üçünü qalib başa vuran Anna ardınca pley-off mərhələsində də məğlubiyyətsiz irəliləyib.
Anna bu mərhələdə keçirdiyi görüşlərdə yüksək əzmkarlıq nümayiş etdirirək parlaq çıxışla yadda qalıb. Başta pley-offun ilk görüşündə İspaniya təmsilçisi Arakelli Navarra ilə qarşılaşıb. Gərginliyi ilə yadda qalan görüşdə Anna 15:14 hesablı çətin qləbə qazanıb.
Növbəti mərhələdə sablyaçımız Gürcüstan idmançısı Teodora Kakianini 15:10 hesabı ilə üstələyərək ən güclü dörd qadın sablyaçı sırasına yüksəlib.
Burada polşalı Silviya Matuzjakla qarşılaşan Anna zəfər yürüşünü davam etdirib. Bu dəfə dörd xallıq fərqlə (15:11) qalib gələn qılıncoynadanımız turnirin finalına vəsiqə qazanıb.
Almaniyalı Anna Limbaxla həlledici görüş gözlənildiyi kimi çətin alınıb. Ancaq sonda daha dəqiq olan Anna Başta rəqibini 15:13 hesabı ilə məğlub edərək Avropa Olimpiya Təsnifat Turnirinin qalibi olub.
Beləliklə, Anna Başta 23 iyul-8 avqustda Tokioda keçiriləcək 4 illiyin zirvə yarışında ölkəmizi təmsil edəcək.
