Sürətlə yüksələn qızılın qiymətləri gözlənilmədən ucuzlaşıb. Beynəlxalq bazarlarda bir unsiya qızılın dəyəri bir gün ərzində təxminən 6 dollar azalıb.
Analitiklər qiymətlərin enməsini ABŞ-də dolların möhkəmlənməsi və investorların riskli aktivlərə yönəlməsi ilə izah edirlər.
İqtisadçı Natiq Cəfərli AZXEBER.COM-a açıqlamasında deyib ki, dünya birjalarında qızılın qiymətləri bir müddət öncə kəskin bahalaşmışdı:
"Dünya birjalarında qızılın qiymətləri bir müddət öncə kəskin bahalaşdı. Son bir neçə ayda 30 faizə yaxın artım var idi. Lakin son günlər 15 faizlik gözlənilməz enmə müşahidə olunub. Bu azalma qram qızılın qiymətinə də təsir göstərib”.İqtisadçı bildirib ki, qızılın qiymətinin düşməsi Azərbaycanı da yan ötüşməyib:
"Qızılın qiymətinin düşməsi Azərbaycanı da yan ötüşməyib. Çünki Azərbaycan idxalçı ölkədir və qızıl məmulatları xarici bazarlardan formalaşır. Dünya bazarında qiymətlər dəyişən kimi, Azərbaycanda da eyni tendensiya müşahidə olunur”.
N.Cəfərli qeyd edib ki, hazırda investorlar gəlirlərini fiksə ediblər:
"Belə təlatümlü dövrlərdə qızıl investorlar üçün etibarlı mal rolunu oynayır. Onlar qiymət artımı dövründə xeyli qazanc əldə ediblər. Bundan sonrakı mərhələdə qızılın qiymətində hansı tendensiyaların yaranacağı hələ bəlli deyil. Lakin yaxın zamanda kəskin dəyişiklik gözlənilmir. Bir unsiya qızılın qiymətinin təxminən 4000 dollar civarında qalması ehtimal olunur”.
Şahanə Ziyad
