Bəzi dərmanlar müəyyən bir zaman və tezliklə qəbul edilməli olur ki, effektivliyi tam şəkildə təmin olunsun. Dərmanları düzgün qəbul etməmək müalicənin təsirini azalda bilər və ya əlavə sağlamlıq problemlərinə səbəb ola bilər.
Oruc tutarkən dərman qəbul etmək oruc tutanın orucunu davam etdirməsinə təsir edə bilər. Oruc tutmaq günəş çıxandan gün batana qədər yemək, içmək və bəzi digər işlərdən çəkinməyi tələb edir. Dərman istifadəsi də bu qaydalara təsir göstərə bilər.Lakin oruc tutan şəxs səhhətində fövqəladə vəziyyətlə qarşılaşarsa, orucu pozmağa heç bir səbəb olmadığı üçün dərman qəbul edə bilər.
AZXEBER.COM oruc tutarkən dərman istifadəsi ilə bağlı bir neçə vacib məqamı oxucuların diqqətinə çatdırır:
Oruc tutan şəxs hər hansı dərmanı ağız yolu ilə qəbul edərsə, orucu pozulur. Bu dərmanlara müxtəlif həbləri, şərbət və ya sprey kimi dərmanları misal çəkmək olar.
İynə və ya peyvənd kimi dərmanlar ümumiyyətlə orucu pozmaz. Lakin damar yolu ilə qəbul etdiyiniz hər hansı bir dərman doyurucu, qidalandırıcı funksiyaya malikdirsə orucunuzu pozacaqdır.
Göz damlası, burun spreyi və ya qulaq damcısı kimi dərmanlar isə orucu pozmaz. Bununla belə, diqqətli olmaq lazımdır, çünki bu növ dərmanların birbaşa mədəyə keçməsi riski də mümkündür.
Əgər ciddi sağlamlıq problemi varsa və dərman istifadəsi həyati əhəmiyyət kəsb edirsə, şəxs orucunu pozaraq müalicə almalıdır. Lakin bu halda insan tutduğu orucun qəzasını sonradan tuta bilər.
Nəticə olaraq, oruc tutarkən dərman istifadəsi insanın sağlamlıq vəziyyətindən və istifadə etdiyi dərman növündən asılı olaraq dəyişir. Əgər dərmanın istifadə olunacağı saatı imsak və iftar saatına uyğun dəyişmək mümkün olarsa, dərman qəbulu orucunuzu pozmayacaq.
Aysel Hacızadə
