Pianoçu bəstəkar Rasim Əsgərov yeni layihələr üzərində çalışır.
Pianoçu bu haqda AZXEBER.COM-a açıqlamasında bildirib.
Bəstəkarın sözlərinə görə o, hazırda film üçün musiqi bəstələyir:
"Fevral ayında Dilarə Əliyevanın "Nənəmə məktub" layihəsi üçün musiqi bəstələdim. Çox sevildi. İndi daha bir mahnı üzərində işləyirəm. Bu da sinematik layihə olacaq. Hələ yayımlanmadığı üçün bu haqda çox məlumat verə bilmirəm. Ən uzağı iki aya onu da dinləyicilərə təqdim edəcəyik. Əminəm ki, digər işlərim kimi, bu da çox seviləcək".
Xatırladaq ki, Rasim Əsgərov 1988-ci il, 22 sentyabrda Bakıda, qarmon ifaçısı Zahid Əsgərovun ailəsində anadan olub. Piano ixtisası üzrə ali təhsil alan Rasim Əsgərov "Həyat", "Hiss", "Qəlbimin Səsi", "Sevgim", "Xəyallarım", "Tənhalıq" və digər məşhur kompozisiyaların müəllifidir.
Aranjimançı olaraq da çox sayda məşhur müğənnilərlə birlikdə layihələrə imza atan pianoçu Elnur Məmmədov, Namiq Qaraçuxurlu, Nigar Camal, Eldar Qasımov, Çinarə Məlikzadə, Nazpəri Dostəliyeva, Nisə Qasımova, Mirələm Mirələmov, Nuran, Ayaz Babayev və digər sənətçilərlə birlikdə çalışıb.
Yaradıcılığında Vaqif Mustafazadə dəsti xəttini də unutmayan Rasim Əsgərov bəstəkarın "Sevən könül” adlı kompozisiyasını yeni aranjimanda təqdim edib.
Aysel Hacızadə
