Bu gün "Azersun Arena"da Gənclər Liqasının Çempionlar yolunda II matçını "Roma”ya qarşı keçirən "Qarabağ"ın U-19 komandası 0:3 hesablı yenilgi alıb.
AZXEBER.COM xəbər verir ki, ağdamlıların çalışdırıcısı Rəşad Sadıqov böyük hesablı məğlubiyyəti oyunsonrası mətbuat konfransında dəyərləndirib:
"Məşqçi kimi qarşınıza ilk dəfədi çıxıram. Mənə hələ tam məşqçi demək olmaz. Düzdü, bu komandanı mən çalışdırıram. Xoş, qəribə və öyrəşmədiyim hisslərdi. Erkən qol buraxdıq. Uşaqlarda həyəcan hiss olunurdu. İkinci hissədə komandamız əzmkarlıq göstərdi, yaxşı futbol oynadı. Sadəcə, rəqibin ustalığı və təcrübəsi öz sözünü dedi. "Çelsi”yə qarşı bir az fərqli sistemlə oynayırdıq. Londonda daha ehtiyatlı davranırdıq. Burda isə yaxşı nəticə qazanmağa çalışırdıq. İlk matçda oyunumuzu müdafiədən qurmuşduq. Bu dəfə hücumlara çıxmaq istəyirdik. Şikayət etmək istəmirəm. Keçənilki komandadan cəmi 1 nəfər qalıb. Təzə kollektiv qurmuşuq. Yeni oyunçulardan da cəmi 8-ni istifadə edə bilirik. Heyətimizdə isə 13-14 yeni oyunçu var. Hamısından yararlana bilmirəm. UEFA-nın qaydası var ki, 8 nəfər öz yetirməmiz olmalıdı. Bu yaş qrupu da bizdə keçən il olmayıb. Bu baxımdan çətinlik çəkirik. Əimizdən gələni edirik ki, komanda oyuna yaxşı hazırlaşsın. Bu rəqib 3 gün əvvəl "Yuventus” üzərində səfər qələbəsi qazanmışdı. Ustalıq öz sözünü deyir”.
