Adıçəkilən təhsil müəssisəsinin mətbuat xidmətinə istinadən yayılan xəbərə əsasən, Eldarın universitetdən qovulması məsələsinin gündəmə gəlməsinə səbəb onun imtahan kəsiri və dərslərə qatılmaması ilə bağlıdır. Məsələni dəqiqləşdirmək məqsədilə BSU-nun mətbuat xidməti ilə əlaqə saxladıq. Qurumun mətbuat xidmətinin rəhbəri Adil Əliyev "Həftə içi"nə açıqlamasında bu barədə heç bir rus saytına açıqlama vermədiyini bildirdi: "Bunlar hamısı cəfəngiyyatdır və mən hansısa sayta açıqlama verməmişəm. Xəbərin özündə uyğunsuzluq var. Çünki biz kredit sistemində fəaliyyət göstəririk. Bundan başqa, imtahanlar hələ iyun ayında başlayacaq. Başa düşə bilmirik ki, bizim adımızdan niyə belə cəfəngiyyat məlumatlar yayırlar. Axı, biz Eldarı niyə qovmalıyıq? İndi Eldar Azərbaycanda sanki milli qəhrəman kimi qəbul olunur. Bununla yanaşı o, istedadlıdır və həmişə çalışqan tələbə kimi tanınıb". A.Əliyev söhbət əsnasında xəbərin ilk olaraq yayıldığı portal barədə araşdırma apardıqlarını da bildirdi: "Apardığımız araşdırma nəticəsində məlum oldu ki, həmin portalın baş redaktoru ermənidir. Görünür, onlar yalan xəbərlər yaymaqla bizim uğurumuza kölgə salmaq istəyirlər".
Həftə İçi qəzeti
