Xəbər verdiyimiz kimi, Rusiya Dövlət Duması "Luqansk Respublikası” və "Donetsk Respublikası”nın müstəqil dövlətlər kimi tanınması ilə bağlı layihəni qəbul edib.
Layihə təsdiq edilməsi üçün Rusiya prezidenti Vladimir Putinə göndərilib.
Politoloq Qabil Hüseynli AZXEBER.COM-a açıqlamasında bildirib ki, bu, açıq təcavüz və anneksiya siyasətidir:
"Luqansk Respublikası” və "Donetsk Respublikası”nın müstəqil dövlətlər kimi tanınması Ukrayna və dünya dövlətləri tərəfindən çox pis qarşılanacaq. Bu, açıq təcavüz, anneksiya siyasətidir. Rusiya artıq neçənci dəfədir ki, bu cür post-Sovet məkanında beynəlxalq hüquqa zidd ilhaq siyasəti aparır və yalançı tanımaqla ilhaq prosesini başa çatdırır. Dünya hərəkətə keçməlidir. Anti-Rusiya koalisiyası formalaşmalıdır. Suveren bir dövlətin torpaqlarını, Krım kimi ərazini qopartdılar, öz tabeçiliyinə keçirdilər. İndi də həmin təcavüzü qondarma parlamentlərində qəbul etdiyi qərarla ilhaq prosesini başa çatdırmaq istəyirlər”.
Politoloq qeyd edib ki, Beynəlxalq Təşkilatlar Rusiyanı işğalçı bir dövlət kimi divara dirəməlidir:
"Tərəqqipərvər bəşəriyyət bu cür təcavüzkar ilhaqa qarşı səsini qaldırmalıdır. Xüsusilə də, Beynəlxalq Təşkilatlar - BMT, ATƏT və digər təşkilatlar Rusiyanı işğalçı bir dövlət kimi divara dirəməli və bu hərəkəti edənləri beynəlxalq məhkəmələrə, beynəlxalq cəlb etməlidir. Donetsk vilayətində baş verən hərbi əməliyyatların hamısı Rusiyanın baş qərargahında hazırlanmış hərəkətlərdir. Buna görə də, Rusiyada siyasi elitada elə adamlar var ki, müharibə canisi kimi, hərbi cani kimi beynəlxalq Haaqa məhkəməsində cavab verməlidir”.
Aydın Nuri
