Rusiyanın müxtəlif şəhərlərində yaşayan azərbaycanlıların bir qismi Rusiya-Ukrayna müharibəsinə müxtəlif yollarla cəlb olunur. Kimisi maaş və vəd edilən güzəştlər üçün, kimisi isə sadəcə zor tətbiq edilməklə, hədələnməklə və deportasiya riski ilə üz-üzə qaldığı üçün razılaşır.
Onlardan bəziləri artıq geri dönməyib, ölüm xəbərləri yayılıb, yaxınlarına cənazələri verilib.
AZXEBER.COM Xəzər TV-yə istinadən məlumat verir ki, Rusiya tərəfindən Ukraynada döyüşən və öldürülənlərdən biri də Zərdab sakinidir. Rayonun Məlikli kənd sakini Fəxri Hacıyev düz 52 yaşında döyüş meydanına aparılıb. O, hərbi əməliyyat zamanı döyüşdə öldürülüb.
Mərhumun qarşdaşı Ziyəddin Hacıyev isə bildirib ki, qardaşı ani vəziyyətdə döyüşlərə cəlb edilib. Nə baş verdiyini heç özləri də tam anlaya bilməyiblər. O, qardaşının zorla döyüşlərə cəlb edildiyini ehtimal edir.
Rusiyanın hərbi sistemində qeyri-rus millətlər, o cümlədən azərbaycanlılar daha çox "alət" kimi istifadə olunur. Onlara hərbi təlim keçilir, bəzi hallarda məxfi əməliyyatlara cəlb olunurlar. Çətin vəziyyətlə üzləşən vətəndaşlarımız isə bu şərtlərlə razılaşmağa məcbur edilirlər.
Bəzi hallarda həmyerlilərimiz bilmədən və ya çarəsizlikdən Rusiya hərbi sisteminə qoşularaq sonradan ciddi çətinliklərlə üzləşirlər. Onlar hazırlıq düşərgələrindən, təlim poliqonlarından, hətta döyüş bölgələrindən ailələri ilə əlaqə saxlayaraq yardım istəməyə çalışırlar. Elə Goranboy rayonunun Borsunlu kənd sakini Şəhruz Əliquliyevin yayımladığı video da bu vəziyyətin bariz nümunəsidir. O, Rusiya ordusuna qoşulduqdan sonra çətin duruma düşdüyünü bildirərək ictimaiyyətdən və aidiyyəti qurumlardan kömək istəyib.
Rusiyada çətin vəziyyətdə yaşayan və müharibəyə göndərilən azərbaycanlılar çox vaxt bu cür kömək çağırışları edirlər. Aidiyyəti qurumlar da bildirirlər ki, belə hallarla üzləşən şəxslər dərhal ölkəmizin diplomatik nümayəndəliyinə, aidiyyəti qurumlara məlumat verməlidir. Həmçinin bu prosesləri ictimailəşdirməlidirlər.
Qeyd edək ki, məhz aidiyyəti qurumlara vaxtında məlumat verilməsi nəticəsində təzyiqlə hərbi təlimlərə cəlb olunan azərbaycanlılar arasında geri qayıdanlar da var. Belə ki, Çeçenistanda saxlanılan və Ukraynaya göndəriləcək 3 Azərbaycan vətəndaşı, Azərbaycan XİN-in vaxtında müdaxiləsi ilə ölkəyə gətirilib.
Xatırladaq ki, Azərbaycan qanunvericiliyinə əsasən, xarici ölkənin ərazisində - xüsusilə vətəndaşı olmadığın bir dövlətin ordusunda - muzdlu kimi döyüşmək qadağandır. Cinayət Məcəlləsinə uyğun olaraq, belə şəxslər uzunmüddətli həbs cəzası ilə cəzalandırıla bilər.
Bənzər hallar əvvəllər də yaşanıb. Xarici ölkələrdəki qanunsuz silahlı dəstələrin tərkibində döyüşənlər Azərbaycanda məhkəmə qarşısına çıxarılaraq həbs cəzaları alıblar. Belə halın Rusiya tərəfindən döyüşlərə könüllü qatılan Azərbaycan vətəndaşlarına qarşı da təkrarlanacağı istisna edilmir.
Ətraflı süjetdə:
