Moldova çaxırının keyfiyyəti ilə narazılığı olan Rusiya bu məhsulun idxalına qadağa qoyub.
APA-nın “BBC”yə istinadən verdiyi xəbərə görə, bu barədə Rusiyanın İstehlak bazarına Nəzarət İdarəsinin (Rospotrebnadzor) rəhbəri Gennadi Onişenko bəyan edib.
“Biz Moldovada istehsal olunan bütün çaxır məhsullarının ölkəyə idxalının dayandırılmasına dair qərar verdik”, deyə o bildirib.
Gennadi Onişenkonun sözlərinə görə, qadağa Moldova problemin sistemli şəkildə həllinə yönəlmiş konkret addımlar atanadək qüvvədə qalacaq.
“Biz Moldova iqtisadiyyatı üçün dayə rolunu oynamaq niyyətində deyilik”, deyə Onişenko vurğulayıb.
İstehlak bazarına Nəzarət İdarəsinin rəhbərinin sözlərinə görə, rəhbəri olduğu qurum Moldova çaxırının tərkibində təhlükəli qatqılar aşkarlayıb.
