Son günlər Rusiya mediası, xüsusilə də dövlətin nəzarətində olan müxtəlif qurumlar Azərbaycana qarşı saxta ittihamlar irəli sürərək informasiya müharibəsi aparırlar.
Onlar bu təxribatı daha çox sosial şəbəkələr, xüsusilə "Facebook" platforması vasitəsilə edirlər.
Əlbəttə ki, bu cür hallar ilk növbədə Azərbaycanın müstəqil siyasət yürütməsi, milli maraqlarına uyğun qərarlar verməsi və regionda artan nüfuzunun bəzi dairələr tərəfindən qəbul olunmaması ilə əlaqəlidir.
Bəs, Azərbaycan Rusiyanın bu hücumundan, yalançı ittihamlarından qurtulmaq üçün nə etməlidir? Bu ölkəyə necə cavab verilməlidir?
Məsələyə münasibət bildirən Milli Məclisin deputatı Elçin Mirzəbəyli deyib ki, bunun əsas səbəbi Rusiyanın milli azlıqlara qarşı həyata keçirdiyi sistemli assimilyasiyadır:
"Bu gün rus mediası, xüsusilə də dövlətin nəzarətində olan təbliğat maşını Azərbaycana qarşı saxta ittihamlar irəli sürərək ölkəmizin tolerantlıq ənənələrini gözdən salmağa çalışır. Halbuki Solovyov da daxil olmaqla, bütün bu simasız təbliğatçıların niyyəti Rusiyada milli azlıqlara qarşı həyata keçirdikləri sistemli assimilyasiya siyasətini gizlətməkdən ibarətdir".
Deputat Rusiyada milli azlıqların assimilyasiyaya uğradılması ilə bağlı statatistikanı da açıqlayıb:
"Rusiya Federasiyasının rəsmi məlumatlarına görə, son illər ölkədə milli azlıqların ana dilini bilənlərin sayı sürətlə azalır. Əgər 1989-cu ildə Mordva dilini bilənlərin sayı 33 faiz idisə, indi cəmi 2 faiz təşkil edir. Mari dilini bilənlərin payı 26 faizdən 4 faizə, Udmurt dilini bilənlərin sayı 30 faizdən 6 faizə, Komi dilini bilənlərin sayı 56 faizdən 10 faizə enib. Rəsmi statistik göstəricilərə görə, 2002-ci ildə tatar dilini 5,3 milyon nəfər bilib. 2021-ci ildə bu göstərici 3,8 milyon nəfərə enib. Yəni 20 il ərzində 1,5 milyon nəfər assimilyasiya siyasəti nəticəsində öz ana dilindən məhrum edilib. 2002-ci ildən 2021-ci ilədək başqır dilini bilənlərin sayı 1,45 milyon nəfərdən 1,09 milyon nəfərə enib. 360 min nəfərlik azalma baş verib. 2002-ci ildən 2021-ci ilədək çuvaş dilini bilənlərin sayı 1,77 milyon nəfərdən 1,1 milyon nəfərə qədər azalıb. 700 min nəfər məxməri assimilyasiya siyasəti nəticəsində öz ana dilindən uzaq düşüb".
Parlamentari onu da qeyd edib ki, Rusiya yalnız öz sərhədləri çərçivəsində deyil, beynəlxalq müstəvidə də xalqların hüquqlarına qarşı çıxır:
"Qeyd edim ki, Rusiya yalnız öz sərhədləri çərçivəsində deyil, beynəlxalq müstəvidə də xalqların hüquqlarına qarşı çıxır. Belə ki, Moskva BMT Baş Assambleyasının qəbul etdiyi Yerli Xalqların Hüquqları Bəyannaməsini dəstəkləməyib. Səbəb təbii ki, aydındır. Moskva xalqların öz torpaqları və resursları üzərində hüququnu tanımaq istəmir. Rusiya həmçinin Beynəlxalq Əmək Təşkilatının 169 saylı Konvensiyasını da ratifikasiya etməyib. Çünki bu sənəd də yerli xalqların mülkiyyət və muxtariyyət hüquqlarını təsbit edir. Bir tərəfdə yüz illərdir mövcud olan milli dillərin və mədəniyyətlərin sıradan çıxarıldığı, dövlət səviyyəsində assimilyasiya siyasətinin aparıldığı Rusiya, digər tərəfdə isə milli azlıqların hüquqlarını qoruyan, onların mədəni irsini inkişaf etdirməyə şərait yaradan Azərbaycan dayanır. Bu müqayisə bütün həqiqəti açıq şəkildə göstərir. Əslində, rus mediasının səngimək bilməyən kampaniyaları da bir göstəricidir: Azərbaycan gücləndikcə, regionda nüfuzu artdıqca, müstəqil siyasətini qətiyyətlə həyata keçirdikcə, Rusiyadakı neoimperialist dairələr və onların təbliğatçıları bundan narahat olurlar. Onların qəzəbi və əsassız ittihamları isə Azərbaycanın gücünün və uğurlarının göstəricisidir".
Mövcud problemlə əlaqəli çox uzun danışmayan Milli Məclisin deputatı Ceyhun Məmmədov AZXEBER.COM-a açıqlamasında deyib ki, Rusiya Azərbaycana qarşı nə edirsə, gec-tez cavabını alır:
"Hesab edirəm ki, bu gün Azərbaycan cəmiyyəti, mediası, Milli Məclisin deputatları, rəsmi qurumlar Rusiyaya kifayət qədər adekvat və samballı cavablar verirlər. Onlar atdıqları hər bir yanlış addımın qarşısını almalıdırlar. Bu həm hüquqi müstəvidə, həm də media müstəvisində icra edilir. Rusiya nə qədər desə də, bar-bar bağırsa da bu ölkə Azərbaycandan daha çox asılıdır. Ona görə Rusiya bu məqamı nəzərə almalıdır. Bilməlidirlər ki, atdıqları addımlar və edilən cəhdlərin qarşısı Azərbaycan tərəfindən yüksək səviyyədə, böyük qətiyyətlə alınır. Əgər ticarətə məhdudiyyətdən söhbət gedirsə, Azərbaycan da bunu edəcək. Yox, əksi olacaqsa, Azərbaycan da bunu davam etdirəcək. Daha yaxşı olar ki, onların da cavabları adekvat olsun və Azərbaycana qarşı nə edəcəklərsə, o cümlədən etməyi planlayırlarsa, hamısının cavabını alacaqlarını öncədən bilsinlər".
Mikayıl Mirzəzadə
Yazı Medianın İnkişafı Agentliyinin "fikir, söz və məlumat azadlığının, plüralizmin inkişaf etdirilməsi" mövzusunda dərc edilib.
