ARDNŞ-in açıqladığı kimi, Bakı-Novorossiyk neft kəməri ilə ildə 5 milyon neft ton ixrac olunurdu və bu ixracat hələ dayanmayıb.
Hələ ki, bu barədə müzakirələr gedir. Bu dövr ərzində də bir çox məsələlər həll oluna bilər. Rusiyanın Azərbaycan neftini öz ərazisi ilə tranzitini dayandırması qərarına gəlincə, bu təbii ki, Azərbaycana təsir etməyəcək. Çünki ölkəmizin əsas ixrac kəməri Bakı-Tiflis-Ceyhan (BTC) neft boru kəməridir.
Azərbaycan Prezidenti yanında Strateji Araşdırmalar Mərkəzinin (SAM) direktoru Fərhad Məmmədov Trend-ə açıqlamasında bildirib ki, Rusiyanın Bakı-Novorossiyk neft kəməri vasitəsi ilə Azərbaycan neftinin tranzitini dayandırması barədə qərarını şərh edərkən deyib.
Bundan əlavə, SAM-ın direktoru bildirib ki, yaxın illərdə neftin ixracatı azalacaq və bu barədə proqnozlar hələ 90-ci illərin ortalarında verilmişdi. Amma BTC-nin buraxılış imkanları ildə 50 milyon tondur. Kəmərin il ərzində tam gücü ilə işləməsi üçün hələ Qazaxıstanın nefti də lazım olacaq:
"Rusiyanın Azərbaycan neftinin öz ərazisindən tranzitini dayandırması tam iqtisadi məsələdir. Biz hazırda neftimizi Rusiya vasitəsilə də dünyaya çatdırırıq. Bizim əsas məqsədimiz Azərbaycan neftini, enerji ehtiyatlarını dünya bazarına çatdırmaqdır və biz bu məsələni artıq özümüz üçün də həll etmişik".
Azərbaycan və Rusiya arasında mövcud olan münasibətlərin səviyyəsini şərh edən SAM-ın direktoru bildirib ki, ticarət dövriyyəsi bütün münasibətlərin əsasını təşkil edir:
"Rusiya ilə münasibətlərdə son illərdə bu sahədə artımdan başqa heç nə müşahidə olunmur. Mədəni və digər sahələrdə də əlaqələrimiz yüksək səviyyədədir. Azərbaycanla Rusiya arasında heç bir problem yoxdur".
Rusiyanın Ermənistanı silahlandırılması barədə də danışan F.Məmmədov deyib ki, Ermənistan Rusiya ilə müttəfiqdir və bu çərçivədə də iki ölkə arasında müəyyən işlər aparılır, amma Azərbaycan vəziyyəti diqqətlə izləyir.
Qeyd edək ki, Rusiya hökuməti Azərbaycan Respublikası və Rusiya Federasiyası arasında Azərbaycan neftinin Rusiya Federasiyası ərazisindən nəql olunmasına dair 18 yanvar 1996-cı ildə imzalanmış müqaviləni ləğv edib.
