Çingiz Qənizadə: “Rüstəm İbrahimbəyov vahid namizəd olmayacaq, Milli Şura isə dağılacaq”
“Ermənistanda hər kəs azərbaycanlılara qarşı düşmən mövqeyinə köklənir və belə bir qəddar milləti anlayışlı xalq kimi təqdim etməklə Rüstəm İbrahimbəyov öz milli kimliyinin üzərindən xətt çəkdi. Onun azərbaycanlıların adından danışmağa, müxalif düşərgənin vahid namizədi olmağa mənəvi haqqı yoxdur”. Bu sözləri Editor.az-a açıqlamasında Milli Məclisin deputatı, hüquq müdafiəçisi Çingiz Qənizadə Milli Şuranın sədri və vahid namizədi Rüstəm İbrahimbəyovun Dağlıq Qarabağın təkcə azərbaycanlıların torpağı olmadığı, erməniləri anlayışlı xalq kimi qəbul etməsi ilə bağlı fikirlərini şərh edərkən belə deyib.
Onun sözlərinə görə, Rüstəm İbrahimbəyovun vahid namizəd kimi göstərilməsi ənənəvi müxalifət düşərgəsinin ən böyük səhvi idi və onlar tezliklə bu səhvlərini düzəltməyə çalışacaqlar: “Əgər bir adam açıq-açığına azərbaycanlıları təhqir edirsə, ölkənin suverenliyini təhdid edirsə, düşmən milləti “göylərə qaldırırsa” onun müxalifətin vahid namizədi kimi irəli sürülməsi biabırçılıqdır. O ermənilərin lideridir, azərbaycanlıların yox. Milli Şura ilə bağlı proqnozlarımı hələ 20 gün qabaq vermişdim və bir daha təkrar edirəm ki, bu qurum seçkilərədək dağılacaq. Rüstəm İbrahimbəyov nəinki müxalifətin vahid namizədi ola bilməyəcək, əksinə onun ideya müəllifi və rəhbəri olduğu Milli Şura müxalifət daxilində ciddi və növbəti parçalanmaların əsasını qoyacaq”.
