İsa Qəmbər Rüstəm İbrahimbəyovun namizədliyini təsdiqləyib. Onun sözlərinə görə, Rüstəm İbrahimbəyov bu ayın sonunadək ölkəyə qayıdacaq. İsa Qəmbər əminliyini ifadə edib ki, Milli Şuranın namizədi ölkəyə 100 min nəfərlik mitinqədək qayıdacaq.
***
12.28
Rüstəm İbrahimbəyovun elektron imzası alınıb. İmzanı Eldar Namazov nümayiş etdirib.
***
12.17
Əli Kərimli Rüstəm İbrahimbəyovun namizədliyini dəstəkləyib.
Milli Şura sədrinin memorandumu imzalayacağı və məsuliyyəti üzərinə götürdüyünü bəyan edəcəyi gözlənilir.
***
12.08
Vətəndaş Həmrəyliyi və Açıq Cəmiyyət partiyaları da Rüstəm İbrahimbəyovun namizədliyini dəstəkləyiblər.
***
12.01
Əvəz Temirxan da Rüstəm İbrahimbəyovun namizədliyini dəstəkləyib. Onun sözlərinə görə, bu, tarixi məqamdır. Əvəz Temirxan xatırladıb ki, Rüstəm İbrahimbəyov “Oskar” mükafatı laureatıdır, yüksək intellektli insandır və bu keyfiyyətlər onun ən uğurlu namizəd olduğunu göstərir.
***
11.52
Musavat.com-un məlumatına görə, vahid namizədlə bağlı müzakirələr başlayıb. Eldar Namazov vahid namizədliyə Milli Şura sədri Rüstəm İbrahimbəyovun namizədliyini irəli sürüb.
***
11.48
Daha sonra Hacıbaba Əzimov çıxış edib. O, Milli Şuranın memorandumunun yenidən müzakirəyə çıxarmağa cəhd edib. Lakin bu təşəbbüs Şura üzvlərinin narazılığı ilə qarşılanıb.
***
11.47
Musavat.com-un sessiyanı izləyən əməkdaşının verdiyi məlumata görə, sessiyada əvvəlcə AXCP sədri Əli Kərimli çıxış edib. Sonra Mustafa Hacıbəyli təklif edib ki, Milli Şurada mitinqlərin təşkili üçün komissiya yaradılsın.
İqtisadçı Qubad İbadoğlu deyib ki, Bakı Avropada rəsmi statusu olmayan yeganə şəhərdir. Onun sözlərinə görə, paytaxtda mer seçkiləri keçirilməlidir.
***
11.26
Demokratik Qüvvələrin Milli Şurasının (DQMŞ) 2-ci sessiyası öz işinə başlayıb. "Qafqazinfo" xəbər verir ki, sessiyanı AXCP sədri ƏLi Kərimli açıb. O bildirib ki, Milli Şuranın sədri Rüstəm İbrahimbəyov müəyyən səbəblərdən bugünkü sessiyada iştirak edə bilmir və onlar sədri əvəz edirlər.
Qeyd edək ki, Milli Şura üzvlərinin müzakirəsinə təqdim olunacaq gündəlik layihəsinə aşağdakı məsələlər daxil edilib:
1. İşçi qrupunun keçid dövrü və DQMŞ-in vahid namizədinin öhdəlikləri haqqında hazırladığı memorandumun qəbulu
2. DQMŞ-in prezidentliyə vahid namizədinin irəli sürülməsi
3. Azərbaycan Respublikasının Milli Məclisinə, Baş Prokurorluğuna və Mərkəzi Seçki Komissiyasına müraciət
4. DQMŞ-in prezidentliyə vahid namizədin seçki qərargahının formalaşdırılması üçün tövsiyə qərarı
5. Cari məsələlər
