Elxan Məmmədovun "Foqts istefa!" şüarının qarşısını almaq məqsədi ilə tribunalara öz adamlarını yerləşdirməsindən xəbərdar olan fan-klub rəhbəri baş katibin gecikdiyini bildirib: "Deyəsən onlar indi ayılıb. Biz isə artıq lazım olan biletləri almışıq. Demək olar ki, 15-20 gündü bütün sektorlara bilet paylayıram. 10 sektorun hərəsindən 5-6 bilet alıb uşaqlara vermişəm. Məqsəd bütün stadionun "İstefa" tələb etməsidi. Artıq bu qaçılmaz hala gəlib. Foqts istefa verməlidi".

"Xəmsə"nin rəhbəri fan-klubların bu gecə toplaşaraq, qərar verəcəyini bildirib: "Bu axşam fan-klublarla toplantı keçirmək fikrimiz var. Bütün fan-klublarla danışmışam. Hamısının gələcəyi gözlənilir. Yalnız "11-ci sektor" imtina edib. Onlar dedi ki, "biz sona kimi gözləyəcəyik". Bu gün axşam saatlarında görüşəcəyik. Bundan sonrakı addımlarla bağlı orda qəbul olunacaq".

"Foqts-mokus artıq bizi bezdirib. Nə qədər hörmətsizlik, nə qədər saymamazlıq olar. İnanın ki, Foqtsun adı çəkilən qəzeti parçalayıb atıram. Bu adam bizi təhqir edir, məsxərəyə qoyur", deyə Adil Məmmədov bildirib.