Xəbər verdiyimiz kimi, Azərbaycan Respublikası Mədəniyyət Nazirliyinin təşkilatçılığı ilə 11-15 noyabr 2023-cü il tarixində Bakı Ekspo Mərkəzində Ümummilli Lider Heydər Əliyevin 100 illik yubileyinə həsr olunan 9-cu Bakı Beynəlxalq Kitab Sərgisi (Baku International Book Fair 2023) keçirilib.
Kitab sərgisində iştirak edən "Qanun" nəşriyyat evinin rəhbəri Şahbaz Xuduoğlu sərgi ilə bağlı təəssüratlarını sosial şəbəkə hesabında bölüşüb.
O deyib: "Sərgimiz sona çatdı. Bu sərginin tam başqa havası vardı. Bürokratik əngəllər, ayrı-seçkilik görmədim. Yalançı pafos, "nazir gəlir, yığışdırın!" söhbəti yox idi.
Nəşriyyatların sayı xeyli artıb. Ümumilikdə, kitab çeşidi də əlbəttə çoxalıb. Türkiyə və Rusiya stendləri kiçilib, məncə də düz edilib. Universitetlər və təhsil üzrə ixtisaslaşmış nəşrlər də bu dəfə daha çoxdur. UNECin stendi xüsusi fərqlənirdi".
O ziyarətçilərə də hər cür şərait yaradıldığını deyib:
"Ziyarətçilərin gəlişi uyğun yerlərdən avtobuslarla təşkil edilmişdi. Tədbirlər üçün gen-bol şərait yaradılmışdı. Könüllülər dəstəsi gələn qonaqları tədbir zonalarına yönləndirirdi.
Yazıçılara da stendlər verilmişdi, giriş salonunda tematik rəsmlərin sərgisi yaxşı təşkil edilmişdi. Bunu məncə daha genişləndirmək lazımdır.
O bildirib ki, sərgiyə ziyarətçi axını olub:
"Bəzən ziyarətçilər o qədər çox olurdu ki, stendlər arasında keçdilər tıxanırdı. Məncə, növbəti dəfə üçün daha böyük salon seçmək lazımdır.
Bizim yer kitabları tam nümayiş üçün kifayət etmirdi, geniş yer olarsa da çox kitab gətirilərdi".
Mədəniyyət nazirinin stendlərə tək-tək yaxınlaşıb kitablarla maraqlandığını deyən Şahbaz Xuduoğlu sözlərinə belə davam edib:
"Adil Kərimli tək-tək stendlərə baş çəkdi, maraqlandı, yaxşı sözlər dedi. Hətta "Təkərli kitab dükanı"na da baş çəkdi.
"Təkərli"nin qarşısında uşaq tamaşasına baxdı və uşaqlarının sevincinin şahidi oldu "Bizə məhz belə proqramlar lazımdır".
Sonra Təkərli kitabla tanış oldu:
"Bunu işinə və kitaba böyük sevgisi olanlar edə bilər, biz bu işi mütləq böyütməliyik".
