"Qarabağ” Çempionlar Liqasının həyəcanını Bakıya daşıyır. Oktyabrın 1-də saat 20:45-də Tofiq Bəhramov adına Respublika stadionunda Ağdam təmsilçisi Danimarkanın "Kopenhagen” klubu ilə üz-üzə gələcək.
"Səbail" klubunun sabiq baş məşqçisi Şahin Diniyev AZXEBER.COM-a matçla bağlı gözləntilərini bölüşüb.
O deyib ki, bizi maraqlı oyun gözləyir: "Həqiqətən də bu qarşılaşma Qarabağın son uğurlarından sonra xüsusi önəm daşıyır. Həm azarkeşlər, həm də Qarabağı sevənlər bu oyuna böyük ümidlərlə baxır”.
Ekspert bildirib ki, bu gün bol qollu oyun gözləyir:
"Ümumiyyətlə, Çempionlar Liqasında zəif rəqib olmur. "Kopenhagen” də sıradan bir rəqib deyil. Rəqibin son oyunda göstərdiyi performans da onu deməyə əsas verir ki, gərgin və maraqlı görüş olacaq. Düşünürəm ki, hər iki komanda hücum futbolu sərgiləyəcək. Bol qollu oyun izləyə bilərik. Ən əsası isə, hamımız "Qarabağ"ın qalib gəlməsini arzulayırıq. Qələbə üçün çox çalışmaq lazımdır. "Qarabağ"a uğurlar arzulayıram”.
Şahanə Ziyad
