Gənclər Turizm İctimai Birliyi və “Təbiət Dostları” Gənclər İctimai Birliyinin təşəbbüsü, “İRƏLİ” İctimai Birliyi ilə Yaşıl Velosipedçilər Klubunun birgə əməkdaşlığı və Azərbaycan Respublikası Gənclər və İdman Nazirliyinin maliyyə dəstəyi ilə “Sağlam Nəqliyyat Sağlam Gənclik” adlı layihəsinə start verilir.
AZXEBER.COM xəbər verir ki, layihə çərçivəsində 22-23 fevral 2014-cü il tarixlərində gənclər üçün praktiki və nəzəri hissədən ibarət olan Velotəlimlər keçiriləcək.
Layihənin məqsədi gənclərin asudə vaxtının səmərəli təşkili və gənclər arasında sağlam həyat tərzinin aşılanması prosesində velosipedin rolunun artırılmasıdır.
Layihə Bakı şəhərində velosipedin təbliğ edilməsi məqsədi ilə təlim proqramı, velotur və velosərginin keçirilməsi kimi fəaliyyətləri özündə cəmləyəcək.
Layihə ərzində gənc fəallar üçün təlim proqramı təşkil ediləcək ki, bu da gənclərin velosipedin sağlam həyat tərzinin qurulmasında və sosial-psixoloji rolu və mühümlüyü sahəsində nəzəri, praktiki biliklərin artırılmasını qarşısına məqsəd qoyur.
Təlim zamanı psixoloji sessiyada təşkil olunacaq ki, bu da iştirakçılar arasında stereotiplər və komplekslərdən azad olmaq üçün çox böyük bir təkan olacaq.
Təlim proqramlarından sonra 1 mart 2014-cü il tarixində təlim proqramında iştirak edən gənclərin iştirakı ilə Bakı şəhəri Milli Parkında böyük bir velotur həyata keçiriləcək. Layihə çərçivəsində 2 mart 2014-cü il tarixində Bakı şəhərində velosiped satışı ilə məşğul olan firmaların iştirakı ilə Park Bulvar Ticarət Mərkəzində VeloSərgi və layihənin bağlanış mərasimi keçiriləcək.
Velo Təlimlərdə iştirak etmək istəyən gənclər 14 Fevral 2014-cü il tarixinədək elektron ərizə formasını dolduraraq müraciət edə bilərlər.
