Ermənistanda keçirilən parlament seçkilərində səs verdikdən sonra jurnalistlərə açıqlama verən "Ermənistan” blokunun nümayəndəsi İxşan Saqatelyan bildirib ki, 7 iyun erməni xalqının tarixində dönüş nöqtəsi ola bilər və xalqın utanc və rüsvayçılıq səhifəsini tamamilə bağlamaq imkanı var.
AZXEBER.COM xəbər verir ki, Saqatelyan qeyd edib ki, o, Ermənistanın, sabitliyin, təhlükəsizliyin və inkişafın naminə səs verib.
Baş nazir Nikol Paşinyanın xalqın istənilən seçimini qəbul edəcəyi ilə bağlı bəyanatını şərh edən Saqatelyan deyib ki, Paşinyanın bununla razılaşmamaq imkanı yoxdur.
Onun sözlərinə görə, Paşinyan seçkiqabağı dövrdə və hazırda da seçimin nəticələri ilə barışmaq istəmədiyini müxtəlif yollarla nümayiş etdirir, lakin buna məcbur olacaq.
Saqatelyan hakimiyyət orqanlarını inzibati resurslardan istifadə etməkdə ittiham edib. O bildirib ki, səhər saatlarından etibarən saxlanmalar davam edir və müxalif qüvvələrin fəaliyyətinə mane olmaq cəhdləri müşahidə olunur.
"Vətəndaşları vicdanla səs verməyə və ölkənin taleyini müəyyənləşdirməyə çağırıram. Hakimiyyət nümayəndələrinin bəyanatlarına diqqət yetirməyin. Bu, xalqın etimadını itirmiş insanların davranışıdır”, – deyə Saqatelyan vurğulayıb.
O, seçki günü iki əsas pozuntu növünün qeydə alındığını bildirib. Bunlardan biri könüllülərin və seçki qərargahlarının məsul şəxslərinin saxlanılması, digəri isə açıq şəkildə səsvermə hallarıdır.
"Bundan əlavə, bölgələrdə bəzi polis əməkdaşlarının təkrar səs verməyə cəhd göstərə biləcəyi ilə bağlı narahatlıqlar və müəyyən məlumatlar var. Belə qanun pozuntularından çəkinməyi tövsiyə edirik. Bu hallar aşkar ediləcək”, – deyə Saqatelyan əlavə edib.
