Bazarın topdansatış anbarının seyfindən yarım milyon manat aparan oğru pulların bir qismini yerə səpələyərək aradan çıxıb...
Fevralın 27-dən 28-nə keçən gecə “Sədərək” bazarında müdhiş oğurluq hadisəsi baş verib. Bu haqda redaksiyamıza daxil olan xəbərdə deyilir ki, bazarın “Kitayski karqo” deyilən topdansatış anbarından yarım milyon manat pul aparılıb.
“Həmin anbarın dörd tərəfində kamera var. Ayın sonu olduğundan anbar sahibləri satdıqları malların hesabını aparıb, gəlirlərini hesablayıblar. Əldə olunan gəlir anbardakı seyfə qoyulub”, - deyə qaynağımız bildirir.
Xəbərdə deyilir ki, ticarətçilər ertəsi gün işə gələndə anbarın üst hissəsindəki şüşənin səliqəli şəkildə kəsildiyini görüblər. Seyfə diqqət edəndə oradakı pulların aparıldığını biliblər. Bundan sonra hüquq-mühafizə orqanlarına məlumat verilib.
Hadisə yerində araşdırma aparan istintaqçılar ərazidəki kameraların yaddaşlarını yoxlayıblar. Məlum olub ki, oğrunun anbara giriş-çıxışı kameraların yaddaşlarında əks olunmayıb. Ona görə də ehtimal olunur ki, oğru anbara yaxınlıqdakı hasarın üstündən keçməklə daxil olub.
Maraqlıdır ki, anbarın həmin hissəsi kameraların əhatə dairəsinə daxil deyil. Buna görə də istintaqçılar oğrunun bu məqamdan xəbərdar olması qənaətinə gəliblər. Araşdırmalar zamanı o da məlum olub ki, oğrunun pulları yığdığı çanta yırtıq olub və o, pulların bir hissəsini dağıda-dağıda hasarın üstü ilə geri qayıdıb...
Hazırda yarım milyon manatı oğurlayan və ona məlumat dəstəyi verən şəxslərin müəyyən edilməsi istiqamətində istintaq-əməliyyat tədbirləri davam etdirilir. Mövzuya qayıdacağıq.
Musavat.com
