Azərbaycan diplomatiyasında illər ərzində müxtəlif sahələrdə tanınan ailələrin nümayəndələri mühüm vəzifələrdə təmsil olunub.
Onların sırasında dövlət xadimlərinin, alimlərin, ədəbiyyat və incəsənət nümayəndələrinin övladları da yer alır.
Bəzi diplomatların fəaliyyəti təkcə tutduqları vəzifələrlə deyil, həm də mənsub olduqları ailələrin ictimai tanınmışlığı ilə diqqət çəkib.
AZXEBER.COM səfir vəzifəsində çalışmış diplomatlar arasında hansı məmur və tanınmış ailələrin nümayəndələrinin yer aldığını araşdırıb.
Azərbaycan diplomatiyasında son diqqətçəkən təyinatlardan biri Prezidentin ərazi-təşkilat məsələləri üzrə köməkçisi, şöbə müdiri Zeynal Nağdəliyevin oğlu Nemət Nağdəliyevin səfir vəzifəsinə gətirilməsi olub.
Prezident İlham Əliyevin sərəncamı ilə Nemət Zeynal oğlu Nağdəliyev Azərbaycanın Estoniyada fövqəladə və səlahiyyətli səfiri təyin edilib.
Nemət Nağdəliyev Moskva Dövlət Universitetində iqtisadiyyat üzrə bakalavr və magistr təhsili alıb.
Bakı Dövlət Universitetinin (BDU) sabiq rektoru, akademik
Abel Məhərrəmovun oğlu Anar Məhərrəmov da diplomatik sahədə fəaliyyət göstərən
şəxslərdəndir. 
Anar Məhərrəmov hüquq təhsili alıb, hüquq elmləri doktorudur. O, uzun illər Azərbaycan Respublikasının Xarici İşlər Nazirliyi sistemində müxtəlif məsul vəzifələrdə, eləcə də ölkəmizin xaricdəki diplomatik nümayəndəliklərində çalışıb. Prezident sərəncamı ilə Anar Məhərrəmov Azərbaycan Respublikasının İspaniya Krallığında və Andorra knyazlığında, daha sonra isə Estoniya Respublikasında fövqəladə və səlahiyyətli səfiri vəzifələrində fəaliyyət göstərib.
Azərbaycan teatr və kino sənətinin tanınmış simaları, Xalq artistləri Amaliya Pənahova və Yusif Muxtarovun oğlu İlqar Muxtarov da diplomatiyada yüksək vəzifə tutan şəxslər sırasındadır. İlqar Muxtarov 2022-ci ildə Azərbaycanın Müqəddəs Taxt-Tacdakı (Vatikan) fövqəladə və səlahiyyətli səfiri təyin olunub.
O, Bakı Dövlət Universitetinin Şərqşünaslıq fakültəsində təhsil alıb, daha sonra beynəlxalq hüquq istiqamətində ixtisaslaşıb. İlqar Muxtarov Xarici İşlər Nazirliyində fəaliyyətə başlayıb və uzun illər ABŞ istiqaməti üzrə çalışıb. O, Azərbaycanın Meksikadakı səfiri olub, eyni zamanda Kosta Rika, Qvatemala, Kolumbiya, Panama və Peruda Azərbaycanı təmsil edib.
Azərbaycan ədəbiyyatının tanınmış nümayəndəsi, Xalq yazıçısı Anarın oğlu Tural Rzayev də diplomatik fəaliyyəti ilə seçilən şəxslərdən biridir.
Şərqşünaslıq təhsili alan Tural Rzayev diplomatiyaya qədər jurnalistika sahəsində çalışıb. Daha sonra Xarici İşlər Nazirliyi sistemində fəaliyyət göstərib. O, Azərbaycanın Türkiyə və Rumıniyadakı diplomatik nümayəndəliklərində işləyib. 2010-cu ildə Prezident sərəncamı ilə Azərbaycanın Küveytdə fövqəladə və səlahiyyətli səfiri təyin olunub. Tural Rzayev eyni zamanda yazıçı və tərcüməçi kimi də tanınır.
Azərbaycanın Xalq şairi Bəxtiyar Vahabzadənin oğlu İsfəndiyar Vahabzadə də diplomatik fəaliyyəti ilə tanınan şəxslərdən olub.
İsfəndiyar Vahabzadə Bakı Dövlət Universitetinin Şərqşünaslıq fakültəsini bitirib, filologiya üzrə elmi fəaliyyətlə də məşğul olub. O, müxtəlif illərdə Azərbaycanın Xarici İşlər Nazirliyi sistemində çalışıb.
Prezident sərəncamı ilə İsfəndiyar Vahabzadə Azərbaycanın Pakistan və Tacikistanda fövqəladə və səlahiyyətli səfiri vəzifələrində fəaliyyət göstərib. İsfəndiyar Vahabzadə diplomat olmaqla yanaşı, alim və şair kimi də tanınıb.
Azərbaycanın Yaponiyadakı keçmiş səfiri Gürsel İsmayılzadə də tanınmış elm nümayəndəsinin ailəsindəndir.
O, görkəmli tarixçi alim Qüdrət Seyfulla oğlu İsmayılzadənin oğludur. Gürsel İsmayılzadə Bakı Dövlət Universitetinin Şərqşünaslıq fakültəsini bitirib. Daha sonra Yaponiyada təhsil alaraq beynəlxalq münasibətlər üzrə fəlsəfə doktoru elmi dərəcəsi əldə edib. Uzun illər Xarici İşlər Nazirliyində çalışan diplomat 2011-ci ildə Azərbaycanın Yaponiyadakı səfiri təyin olunub.
Azərbaycan diplomatiyasında eyni ailədən olan şəxslərin yüksək vəzifələrdə təmsil olunmasına nümunələrdən biri Həsənov qardaşlarıdır. Dursun Həsənov Azərbaycanın Gürcüstandakı səfiri olub.
Dursun Həsənov
Onun qardaşı Ramiz Həsənov isə Azərbaycanın İspaniyadakı fövqəladə və səlahiyyətli səfiri kimi fəaliyyət göstərib. Ramiz Həsənov bundan əvvəl dövlət idarəçiliyində müxtəlif vəzifələrdə çalışıb, o cümlədən xarici işlər nazirinin müavini olub.
Azərbaycan diplomatiyasında diqqətçəkən nümunələrdən biri də ailə olaraq səfir postunda təmsil olunan diplomat cütlükdür. Hüseyn Hüseynov Azərbaycanın Bolqarıstandakı səfiri olub. Onun keçmiş həyat yoldaşı Leyla Abdullayeva isə Azərbaycanın Fransadakı fövqəladə və səlahiyyətli səfiri vəzifəsində çalışıb. Hüseyn Hüseynov uzun illər Xarici İşlər Nazirliyində müxtəlif vəzifələrdə fəaliyyət göstərib, Azərbaycanın xarici nümayəndəliklərində çalışıb.
Fəridə Əsədzadə
