Son vaxtlar şəhər yollarında ağır tıxaclar müşahidə olunur. İnsanlar saatlarla yollarda qalmaqdan şikayətlənirlər. Sentyabr ayında məktəb və universitetlərin açılması ilə bu vəziyyət daha da pisləşib. Xüsusilə günün pik saatlarında yollarda hərəkət xeyli çətinləşir.
Bəs bu problemdən çıxış yolları varmı?
Məsələ ilə bağlı Milli Məclisin deputatı Razi Nurullayev AZXEBER.COM-a fikirlərini bildirib.
Millət vəkili də şəhər yollarındakı vəziyyətin çox gərgin olduğunu qeyd edib:
"Həqiqətən, şəhər yollarında vəziyyət çox gərgindir. Bir saatlıq yolu iki saata, iki saatlıq yolu dörd saata gedirsən. Bəzən vaxtında işə çata bilmirsən, gecikirsən. Yaxud sənin bir gününün 3-4 saatı yollarda gedir. Nəqliyyat, yol, sıxlıq problemi çox ciddi fəlakətlər törədir. İnsanların əmək qabiliyyətini, iş qabiliyyətini aşağı salır. Görüləcək işlərin effektivliyini azaldır. Digər tərəfdən isə, insanlar, doğrudan da bu şəkildə stress içindədir".
Deputat problemdən çıxış yolları olaraq yeni istiqamətlərdən yolların salınmasını təklif edib:
"Təbii ki, Azərbaycanda evlər tikilib, məhəllələr, şəhər salınıb, amma çox təəsüf ki, şəhərsalınma qaydalarına əməl edilməyib. Yollar geniş deyil, azdır. Bəzi tikintilər xaotik tikilib. Şəhərdə yolları genişləndirilmək imkanları daralıb. Şəhər əhalisi də durmadan artır, kənddəkilər də şəhərə köçür. Çünki şəhərdə yenə az-çox iş tapa bilirlər. Demək ki, ya yeni yollar salınmalıdır, şəhərin içərisində hansısa məhlələr, evlər sökülməlidir, yeni yollar salınmalıdır. Ən azından 4-5 istiqamət var ki, - 20 Yanvar, Binəqədi, Şıxov istiqaməti, bunlarda əlavə yollar salınmalıdır ki, sıxlıqın qarışısı alınsın. Yaxud insanlar alternativ yol tapsın ki, harasa gedə bilsinlər".
R.Nurullayev həmçinin qeyd edib ki, universitetlər mərkəzdən kənara köçürülməlidir:
"Şəhər əhalisi artır və bütün universitetlər, kolleclər də Bakı şəhərində cəmləşib. Vaxtilə bu məsələ hökumətin gündəmində idi ki, universitetlər şəhərdən kənara çıxarılsın. Amma yəqin ki, maliyyə məsələsinə görə bu dayandı. Universitetlərin, kolleclərin də imkanı yoxdur ki, özləri özlərinə bina tiksinlər. Ona görə də, heç olmasa, hər il bir universitetin mərkəzdən kənara çıxarılaraq binasının və kampusunun tikilməsi üçün dövlət büdcəsindən pul ayrılsın. Bunun hamısını birdən etmək olmur. Amma biz ən azından ildə bir universiteti şəhər kənarına çıxarsaq, problemin xeyli hissəsini həll etmiş olarıq".
Aydın Nuri
