Sevgisən, nəsən...
Qonub könlümüzün sarayına sən, Gah qəhqəhə çəkir, gah qəmlənirsən. Eşqsən, məhəbbətsən, sevgisən, nəsən – Bizə gizli-gizli nələr deyirsən?
Qeys Leyli eşqiylə Məcnun oldumu? Züleyxa Yusifçün saçın yoldumu? Sənanın tutduğu doğru yoldumu – Ən doğru olanı sən söyləyirsən.
Ən gözəl musiqi, bilirsən, nədir – Qəlbin tellərində dinən nəğmədir. Mizrabı duyğudur – öz əlindədir, Nəğməni də özün bəstələyirsən.
Gah sevinc payladın, gah qüssə, kədər. Görən, qaytardınmı aldığın qədər?.. Bu dünya sənindir, biz gəldi-gedər – Hələ ki qonağıq, əzizləyirsən...
Mənə divanə deyirlər
Gözlərini görməyənlər Mənə divanə deyirlər. Qəm köynəyi geyməyənlər Mənə divanə deyirlər.
Əridim həsrət çəkməkdən, Saçlarım ağardı dən-dən. Dərdimə əlac etməkdən Mənə divanə deyirlər.
Dəyişdi ömrün axarı – Bu sevdanın yox axırı. Məcnunu yaddan çıxarıb Mənə divanə deyirlər.
Səni sevməkdən qorxuram
Yaşım daha o yaş deyil – Qardan, küləkdən qorxuram. Eşq yaşıma yoldaş deyil – Səni sevməkdən qorxuram...
Hardan gəldin ürkək-ürkək, Duyğulandı donmuş ürək. Yazdan qorxan qartək, buztək Səni sevməkdən qorxuram.
Aylar, illər gözləmişdim, Arzularda bəsləmişdim. Beləsin istəməmişdim – Səni sevməkdən qorxuram.
Qorxu məni eyləyib lal, Min gümana çəkir xəyal. Oxşa məni, könlümü al, Səni sevməkdən qorxuram...
Sədaqət Əhmədova
