Səudiyyə Ərəbistanı vətəndaşları tezliklə Avropa İttifaqı ölkələrinə daxil olmaq üçün Şengen vizası tələbindən azad edilə bilər.
AZXEBER.COM xarici mətbuata istinadən xəbər verir ki, Avropa İttifaqının Səudiyyə Ərəbistanındakı səfiri Kristof Farnaud Səudiyyə vətəndaşlarını Şengen viza tələblərindən tam və ya müvəqqəti azad etmək üçün səylərin davam etdiyini təsdiqləyib.
Farnaud xatırladıb ki, Avropa Komissiyası bir il əvvəl Səudiyyə Ərəbistanı, Bəhreyn, Qətər, Küveyt və Oman vətəndaşlarına qısamüddətli qalmaq üçün çoxdəfəlik Şengen vizası almağa icazə verən tənzimləmə qəbul edib.
Vizadan azad olunmasının bu addımların davamı olduğuna diqqət çəkən Farnaud, bu dəyişikliklərin rahatlıqdan çox Səudiyyə Ərəbistanı ilə Avropa arasında əlaqələrin gücləndirilməsi və müntəzəm mübadilələrin təşviq edilməsi istiqamətində mənalı bir addım olduğunu ifadə etdi.
Farnaud həmçinin Səudiyyə Ərəbistanının beynəlxalq turizmə getdikcə daha açıq olduğunu və Avropanın bu transformasiyanın dəstəklənməsində mühüm rol oynadığını vurğulayıb. Bu yeni viza siyasəti təsdiqlənərsə, Səudiyyə Ərəbistanı vətəndaşları bir viza ilə beş il ərzində bir neçə dəfə Avropaya səyahət edə biləcəklər.
Gülay
