Bir sıra siqaretlərin qiymətləri 20-40 qəpik civarında artıb. Ümumilikdə əvvəlki satış qiyməti 2 manatdan yuxarı olan siqaretlər 30 qəpik, 2 manatdan aşağı olanlar isə 20 qəpik bahalaşıb.
Məsələ ilə bağlı açıqlama verən İqtisadi İnkişaf Nazirliyinin mətbuat xidmətinin rəhbəri Abbas Əliyev bildirib ki, onlarda bununla bağlı məlumat yoxdur: "Siqaret qiyməti bizim tərəfimizdən tənzimlənən mallar siyahısına daxil deyil. Buna görə də qiymətlə bağlı sorğuları siqaret satışı ilə bağlı şirkətlər verə bilər".
Mövzu ilə bağlı Qaynarinfo.Az-a danışan “European Tobacco Baku” ASC (ETB) şirkətinin İdarə Heyətinin sədri, deputat Rüfət Quliyev bildirib ki, bəzi siqaretlərin qiyməti qalxıb.
Rüfət Quliyev qeyd edib ki, “European Tobacco Baku” ASC (ETB) siqaret satışı ilə məşğul olmur: "Biz istehsalçıyıq. Azərbaycan bazarında satılan iki ailə siqareti - "Prima" və "Vaysroy"u biz istehsal edirik. Bunların qiymətində heç bir dəyişiklik yoxdur. Yerli istehsaldır. Düzdür, istehsal zamanı tələb olunan materialın 80 faizi xaricdən gəlsə də, bizdə qiymətlər qalxmayıb. Lazım olanda biz satan şirkətlərə xahiş edirik ki, bu qiymətləri qaldırın. Amma tələb-təklifı hər zaman nəzərə alırıq. İdxal olunan siqaretlərin qiyməti qalxıb. Bu da təbiidir. Çünki idxal olunan mallar dollarla alınır. Dollar-manat məzənnəsində müəyyən qədər dəyişikliyə görə qiymətlərin qalxması qaçılmazdır. Buna görə də bəzi siqaretlərdə qiymət artımı müşahidə olunur, bəzilərində isə olduğu kimi qalıb".
Rüfət Quliyevin sözlərinə görə, bəzi siqaretlərin 2-3 ay bundan əvvəlki qiymətlərilə müqayisədə azalma müşahidə olunur: "İstehsal etdiyimiz siqaretlər 2 manatdan 1 manat 40 qəpiyə düşmüşdü. İndi isə 1 manat 20 qəpiyə düşüb. Bizim ailəyə məxsus siqaretlərdə qalxma müşahidə olunmur".
Deputat vurğulayıb ki, artıq Azərbaycan brendi altında 2 cür siqaret istehsal etməyə başlayıblar: "Çalışacığıq ki, onun də qiymətini tənzimliyək. Artıq Azərbaycan tütünü almağa başlamışıq. Söz verdiyimiz kimi keyfiyyəti yüksək və qiyməti münasib olduğu halda xammal kimi öz tütünümüzdən istifadə edəciyik. İldən-ilə də artım olacaq. Bu il 26 ton Azərbaycan tütünü almışıq. Qiymətlər münasib və keyfiyyət uyğun olarsa, bundan 10 qat çox da almağa hazırıq".
/// Qaynarinfo.Az
