"Yeni Azərbaycan Partiyasının İdarə Heyəti tərəfindən 1 sentyabr Növbədənkənar Parlament seçkilərində iştirak etmək üçün namizədlərin siyahısı təsdiqləndi və ictimaiyyətə açıqlandı. Siyahıyla yaxından tanış olduqda bu qənaətə gəlmək olar ki, mövcud siyahıda təcrübəli siyasətçilər, ağsaqqallar, gənclər, xanımlar və bütün sahələri təmsil edən namizədlər iştirak edir".
Bu sözləri AZXEBER.COM-a açıqlamasında Milli Məclisin deputatı Naqif Həmzəyev YAP-ın qarşıdan gələn Parlament seçkilərində iştirak edəcək namizədlərinin siyahısına münasibət bildirərkən deyib.
Deputat bildirib ki, 1 sentyabr Növbədənkənar Parlament seçkiləri xalqımız, dövlətimiz üçün xeyirli olacaq:
"Belə bir nəticəyə gəlmək olar ki, bu Növbədənkənar Parlament seçkilərindən Yeni Azərbaycan Partiyası növbəti dəfə qələbə qazanacaq. Müasir dövrün yeni parlamentini formalaşdıracaq bu seçkilər Azərbaycanımız, dövlətimiz, xalqımız üçün xeyirli olacaq. Siyahıda adımın olması, mənə qarşı növbəti dəfə etimadın göstərilməsi təbii ki, məni çox sevindirdi, eyni zamanda məsuliyyətimi daha da artırdı".
Millət vəkili partiyada növbəti dəfə namizəd olduğuna görə cənab Prezidentə təşəkkürünü bildirib:
"Mən partiyamızın sədri, cənab Prezident İlham Əliyevə dərin təşəkkürümü bildirirəm və bu etimadı doğruldacağıma söz verirəm. İnanıram ki, bu günə qədər məni dəstəkləyən, YAP-ın yanında olan və həmişə seçkilərdə bizim qələbə qazanmağımız üçün yaxından çalışan Gəncə sakinləri - seçicilərimiz də sözügedən seçki prosesində bizi tək qoymayacaqlar. Yeni dislakasiya əsasında formalaşdırılan 38 saylı Gəncə birinci seçki dairəsində səs vermə hüququ olan gəncəli seçicilərimizi də seçkilərdə aktiv iştirak etməyə və Yeni Azərbaycan Partiyasının namizədlərinə səs verməyə dəvət edirəm".
Mikayıl Mirzəzadə
