Bu havada gidilmez...
Milli Hidrometeorologiya Xidmətinin məlumatına görə, fevralın 24-dən 25-nə keçən gecə ölkə ərazisində soyuq dövrün ən aşağı temperaturu qeydə alınacaq. Bakıda və Abşeron yarımadasında 5-8 dərəcə, Aran rayonlarında 4-9 dərəcə şaxta, dağlıq rayonlarda isə 13-18 dərəcə, yüksək dağlıq ərazilərdə isə 20-25 dərəcə şaxta gözlənilir. Yollar buz bağlayacaq.
Bütün bu xəbərdarlıqlara baxmayaraq, hələ də ölkədə tədrisin tam dayandırılması ilə bağlı heç bir rəsmi qərar yoxdur. Suallar yaranır: Təhsil müəssisələrinə məsul olan şəxslər yolların buz bağlayacağını, insanların hərəkətinin çətinləşəcəyini bilmir? Şaxtalı hava şəraitində müəllimləri, şagirdləri və tələbələri yola salmaq nə qədər məntiqlidir? Onsuz da real vəziyyət budur ki, tələbələrin və şagirdlərin davamiyyəti minimal olacaq, çünki valideynlər övladlarını belə havada məktəbə göndərmək istəmirlər.
Qışın ən sərt günlərindən birində məktəb və universitetlərin açıq qalması, onsuz da aşağı olan davamiyyətin formal şəkildə qeydə alınmasına, lakin insanların həyatının təhlükəyə atılmasına səbəb olacaq. Əgər UNEC və AzTU artıq hava şəraiti ilə bağlı dərsləri onlayn formata keçiribsə, digər universitetlər və orta məktəblər niyə gözləməlidir? Yolların buz bağladığı, şaxtanın sərt olduğu bir gündə dərsə getməyin heç bir təhsil yönümlü əsası yoxdur. Təhsil önəmlidir, amma ilk növbədə insanların təhlükəsizliyi təmin edilməlidir!
Rəsmi qurumlar bu məsələyə ciddi yanaşmalı, lazımi tədbirlər görməli və soyuq hava şəraitində bütün təhsil müəssisələrində dərsləri dayandırmalıdır!
Kamran Əsədov,
Təhsil eksperti
